Սյունիքում իրավիճակն օրեցօր ավելի է բարդանում․ պրոցեսները կառավարելի չեն․ Գորիսի փոխքաղաքապետ. ՏԵՍԱՆՅՈՒԹ

«Իրավիճակը հեռու է կայուն լինելուց, անընդհատ զարգացումներ են տեղի ունենում, օր օրի մեր վիճակն ավելի է վատանում»,- «Սյունիքը պատերազմից հետո. անվտանգության և հաղորդակցության խնդիրները» թեմայով քննարկման ժամանակ այս մասին ասաց  Գորիսի փոխքաղաքապետ Մենուա Հովսեփյանը: Նա նշեց, որ Գորիս-Որոտան ճանապարհի երկայնքով թշնամին խրամատներ է փորում:

«Կապիտուլյացիոն պայմանագրից հետո, երբ խոսում էինք ռուսական կողմի, մեր սահմանապահների հետ, հստակ պատասախան ունեին, որ տվյալ տարածքներում խրամատավորվելու խնդիր չկա, քանի որ տարածքները վերահսկվում են սահմանապահ զորքի կողմից: Բայց արի ու տես, որ թշնամին սկսել է խրամատավորվել շփման գծի երկայնքով: Հենց Որոտան գյուղի շրջակայքում են սկսել առաջին խրամատները փորել: Խրամատավորվելը լավ բան չի նշանակում: Եթե նորից սա թողնեն բացիթողի վիճակում, թշնամին հասցնի  մինչև վերջ խրամատավորվել, դա միանշանակ մեզ  համար կունենա ավելի վատ հետևանքներ՝ ավելի կամրապնդեն իրենց դիրքերը, որոնք ստացել էին GPS-ով:

Իշխանություններն «արդուկում էին» մեր գլուխները՝ ասելով, որ այդ սահմանները վերջնական չեն, պետք է նորից ճշգրտվեն: Բայց խրամատավորվել ինչ որ x տարածքում,  նշանակում է, որ վաղը ոչ մեկ չի կարողանալու իրենց ասել, որ այստեղ չպետք է կանգնեք, այլ, օրինակ, 3 կմ  հետ նահանջեք: Բնականաբար, չի ստացվի»,- նշեց Հովսեփյանը:

Գորիսի փոխքաղաքապետն անդրադարձավ նաև օրեր առաջ Իլհամ Ալիևի արած այն հայտարարությանը, որ պատմական Ադրբեջանին պատկանող Զանգեզուրով անցնող ճանապարհային միջանցքը շուտով կաշխատի,  Թուրքիան ու Ադրբեջանը միմյանց հետ կկապվեն:

«Ուղղակի չեմ հասկանում՝ մեր երկրում չկա՞ն իշխանավորներ, որոնք ռիսկ կանեն այս հարցադրումներին պատասախանել: Ե՞րբ ենք մենք վերջապես պատասխանելու: Ի՞նչ է նշանակում՝ թշնամի երկրի ղեկավարը հայտարարում է  պատմական Ադրբեջանին պատակող Զանգազուրը, մենք ոչինչ չենք ասում: Ստացվում է՝ մենք ընդունո՞ւմ ենք իր ասածը: Բնականաբար, մենք մերժում ենք, չի կարող նման բան լինել: Այդ հայտարարությունն իրականության հետ ոչ մի աղերտ չունի: Կոչ եմ անում ավելի լուրջ հետևել այս ամեն ինչին, վերջապես պետք է գտնել մի տղամարդ,  որը կարող է պատասախան տալ»,- նշեց Հովսեփյանը:

Փոխքաղաքապետը ևս մեկ անգամ կրկնեց, որ Սյունիքում օրեցօր իրավիճակն ավելի է բարդանում՝ կապված տեղի ունեցող պրոցեսների հետ: «Այս պահի դրությամբ պրոցեսներն, ըստ իսկ, կառավարելի չեն, ինքնահոսի են, և մեր թշնամին ինչ ուզում, երբ ուզում, անում է: Թշնամին այսօր խրամատ է փորում, ինչ ուզում անում է, բայց մեկը չի ասում, ամենաբարձր մակարդակով, վարչապետ կոչվածը, չի վեր կենում ու ասում՝ ժողովուրդ ջան, հիմա Ալիևին ես պատասխան կտամ»,- ասաց Հովսեփյանը:

Մանրամասները՝ տեսանյութում: