15.10.2026 | 00:05
NATO-ի նավատորմին ծառայություններ մատուցող ընկերությունը կասկածվում է 1 միլիոն եվրոյի խարդախության մեջ
Քննարկվել է առողջապահության մայր օրենքի հայեցակարգը
31.01.2018 | 18:42
ՀՀ առողջապահության նախարարին կից հասարակական խորհրդի հերթական նիստը խորհրդի նախագահ, նախարար Լևոն Ալթունյանի լիազորությամբ նախագահել է ՀՀ առողջապահության նախարարի տեղակալ Սերգեյ Խաչատրյանը:
Օրակարգում ընդգրկված էին «Առողջապահության մասին» Հայաստանի Հանրապետության օրենքի հայեցակարգին հավանություն տալու մասին» ՀՀ կառավարության արձանագրային որոշման նախագիծը, «Հայաստանում պարտադիր բժշկական ապահովագրությունը ներդնելու մասին» և մարդու իրավունքների պաշտպանության ազգային ռազմավարությունից բխող 2017-2019 թվականների գործողությունների ծրագրի կատարման ընթացքի մասին զեկույցները:
Հակիրճ ներկայացնելով «Առողջապահության մասին» Հայաստանի Հանրապետության օրենքի հայեցակարգին հավանություն տալու մասին» ՀՀ կառավարության արձանագրային որոշման նախագծով կարգավորվող հիմնական հասկացությունները, օրենքի դրույթները, կարգավորման առարկան, իրավասությունները` ՀՀ առողջապահության նախարարի տեղակալ Սերգեյ Խաչատրյանն ընդգծել է, որ հայեցակարգի նախագիծը «Առողջապահության մասին» ՀՀ օրենքի մշակման առաջին քայլն է, ինչն ընդգրկված է ՀՀ առողջապահության նախարարության 2018 թվականի գերակա խնդիրների ցանկում: Հասարակական խորհրդի անդամները ներկայացրել են իրենց դիտարկումները հայեցակարգի նախագծի վերաբերյալ:
«Տնտեսական իրավունքի կենտրոն» ՀԿ նախագահ Մովսես Արիստակեսյանն իր զեկույցում անդրադարձել է պարտադիր բժշկական ապահովագրության հիմնական սկզբունքներին, առավելություններին ու միջազգային փորձին:
ՀՀ առողջապահության նախարարության աշխատակազմի իրավաբանական վարչության պետ Էմին Ավետիսյանը հակիրճ ներկայացրել է մարդու իրավունքների պաշտպանության ազգային ռազմավարությունից բխող 2017-2019 թվականների գործողությունների ծրագրի ՀՀ առողջապահության ոլորտին վերաբերող 22 կետերի կատարման ընթացքը:
Ամփոփելով նիստը՝ ՀՀ առողջապահության նախարարի տեղակալ Սերգեյ Խաչատրյանը կարևորել է քաղաքացիական հասարակության ակտիվ ներգրավվածությունը նախարարության կողմից մշակվող և իրականացվող ծրագրերում:
