Հիմնական քո պատճառով ա, որ երկիրն այս օրին ա. Գագիկ Ծառուկյանը՝ լրագրողին

«Ուրեմն ասեմ, ես ոչ թե հազվադեպ եմ գալիս, դուք պետք է զգաք և տեսնեք, որովհետև ամբողջ ժողովուրդը ձեզնից է ինֆորմացիա ստանում։ Պատգամավորների 90%-ը գալիս են, անմիջապես վազելով ներկա ստանում են, մի ժամ հետո, գիտեք, խորհրդարանը դատարկ է, հինգ-վեց հոգի նստած լինեն, թե չէ։ Ծառուկյանը գործով է զբաղվում, Ծառուկյանի կատարած գործը մեկ ամիս առաջ, որ Եվրախորհրդարանից բերեց 70 պատգամավոր, որից 20-ին տարավ Ղարաբաղ, ինձ թվում ա՝ որևէ պատգամավոր իր ամբողջ կյանքում այդպես արդյունավետ աշխատանք չի կատարել։ Մարդը պետք ա գործով արդյունավետ լինի, ոչ թե Ծառուկյանը եկավ ներկա գրանցվեց, ոնց որ հիմա, գրանցվեցի, դուրս եկա, դա նշանակո՞ւմ է արդյունավետ աշխատանք: Մարդու գործը պետք ա արդյունավետ լինի»,- խորհրդարանում պատասխանելով իր բացակայությունների մասին լրագրողի հարցին՝ ասաց Ազգային ժողովի նիստերից գրեթե միշտ բացակա գործարար պատգամավորը:

Գագիկ Ծառուկյանի բացակայությունների հիմնական մասն ԱԺ աշխատակազմի կողմից համարվել է հարգելի: Թե ինչ տեղեկանքներ են ներկայացվել, Ծառուկյանը չմանրամասնեց: «Համապատասխան դիմեք, ձեզ կներկայացնեն: Աղջիկ ջան, հիմա դու, որ նայում ես, Ծառուկյանի աշխատանքը դրակա՞ն ես գնահատում, թե՞ բացասական: Հիմնական քո պատճառով ա, որ երկիրն այս օրին ա, մարդկանց ոչ ճիշտ տեղեկություններ եք տալիս, պատվերներ եք կատարում, դուք ապրում եք այս երկրում, ձեր երեխաներն այս երկրում են ապրում, պետք է մարդու գործը գնահատել, ոչ թե դեմագոգիայով զբաղվել»,- բորբոքված դիմելով լրագրողին՝ ասաց Գագիկ Ծառուկյանը: