Ղարաբաղի անորոշ կարգավիճակն առաջիկա ժամանակներում այդպիսին էլ կմնա․ ռուս փորձագետ

Մոտ ժամանակներում Լեռնային Ղարաբաղի շուրջ ձեռք բերված համաձայնությունը կպահպանվի, քանի որ Բաքվին, ընդհանուր առմամբ, այն ձեռնտու է․ Ադրբեջանը դեռ պետք է զբաղվի ձեռք բերած տարածքների յուրացմամբ, իսկ Երևանը բավական ռեսուրսներ չունի ռևանշի համար։ ՌԻԱ Նովոստիի հետ զրույցում նման կարծիք է հայտնել ՌԳԱ ՄՏՀԻ Կովկասի գծով առաջատար գիտաշխատող Վադիմ Մուխանովը։

Միևնույն ժամանակ, ըստ փորձագետի, օդից կախված է մնում Լեռնային Ղարաբաղի կարգավիճակի հարցը, որը չի ճանաչում ո՛չ Հայաստանը, ո՛չ էլ Ադրբեջանը։

«Ի՞նչ կլինի ապագայում այնտեղ գտնվող բնակչության հետ: Այս խնդիրները պայմանագրում մանրամասն շարադրված չեն, համաձայնագիրը այլ նպատակ ուներ»,- ասել է Մուխանովը:

Նրա կանխատեսմամբ՝ առաջիկա ժամանակներում Ղարաբաղի անորոշ կարգավիճակն այդպիսին էլ կմնա։ Ինչ վերաբերում է հետագա կանխատեսումներին, ապա համաձայնագիրն առաջիկայում կպահպանվի:

«Կարճաժամկետ հեռանկարում դա ձեռնտու է, մասնավորապես, ադրբեջանական կողմին։ Բաքուն ստիպված կլինի լուծել շատ խնդիրներ, որոնք առաջացել են համաձայնագրի կնքումով, ինչի արդյունքում Ադրբեջանի համար լուրջ տարածքների նկատմամբ վերահսկողություն է ձեռք բերվել, անհրաժեշտ է լուծել վերաբնակների հարցը, տարածքների սոցիալ-տնտեսական զարգացման հարցը»,- մանրամասնել է փորձագետը:

Համաձայնագիրը, իհարկե, ձեռնտու չէ հայկական կողմին, բայց այն «այժմ ուժ և կարողություն չունի՝ վերստին ներգրավվելու այս հակամարտության լուծմանը և ինչ-որ վրեժ լուծելու», կարծում է Մուխանովը:

«Ղարաբաղում կրած պարտության կծիկի հետ մեկտեղ՝ Հայաստանը ստացավ հզոր ներքաղաքական ճգնաժամ, ուստի Երևանի էլիտան առաջին հերթին կզբաղվի այս ներքաղաքական ճգնաժամի լուծմամբ, այնուհետև կքննարկի Ղարաբաղը: Հիմա Նիկոլ Փաշինյանի և նրա թիմի համար առաջնահերթ նպատակը իշխանության մնալն է»,- ՌԻԱ Նովոստիին պարզաբանել է քաղաքագետը:

Տաթև Ֆռանգյան