04.11.2026 | 20:29
Վարչապետն ընդունել է ՀՀ պետական մրցանակակիր Քեմ Ղաֆֆարիանին
Թուրքիայի ոստիկանությունը ՌԴ քաղաքացի կանանց է ձերբակալել
Քաղաքականություն
04.11.2026 | 16:19
Թուրքիայի մայրաքաղաք Անկարայում բարոյականության և հասարակական կարգի խախտման մեղադրանքով ձերբակալվել են Ռուսաստանի 34 քաղաքացիներ՝ կանայք։ Այս մասին հաղորդում է «ՌԻԱ Նովոստի»-ն՝ հղում անելով Անկարայում Ռուսաստանի դեսպանատան մամուլի ծառայությանը։
«Մեր ունեցած տեղեկությունների համաձայն՝ հոկտեմբերի 23-ին Անկարայի «Մաքսիմ», «Հավանա» և «Ֆոլիբերժեր» գիշերային ակումբներում ոստիկանության իրականացրած ստուգումների ընթացքում ձերբակալվել են Ռուսաստանի 34 քաղաքացի կանայք։ Թուրքիայի իշխանությունները որպես ձերբակալության պատճառ նշում են բարոյականության և հասարակական անվտանգության կանոնների խախտումները»,- հայտնել են դեսպանատնից։
The Insider-ը գրում է, որ կանանց տեղափոխել են Անկարայի «Աքյուրութ» արտաքսման կենտրոն։ Ռուսաստանի դեսպանատան տեղեկություններով՝ նրանց հետագա ճակատագիրը կորոշի դատարանը։
Դեսպանատան մամուլի ծառայությունից հայտնել են նաև, որ կանանց բջջային հեռախոսներն առգրավվել են, սակայն նրանց հնարավորություն է տրվել կապ պահպանել հարազատների հետ՝ քաղաքային հեռախոսակապի միջոցով։
Միևնույն ժամանակ, Baza տելեգրամ ալիքի հաղորդմամբ՝ գիշերային ակումբներում իրականացված նույն ստուգայցերի ընթացքում ձերբակալվել է ավելի քան 100 աղջիկ, որոնց մեծ մասը ԱՊՀ երկրներից են։ Ձերբակալված ռուսաստանցի կանանցից մեկի ընկերուհու խոսքով՝ աղջիկներին աշխատանքի էին հրավիրել որպես պարուհիներ, երգչուհիներ կամ դիջեյներ, սակայն հետագայում նրանցից պահանջել էին նաև հանդես գալ որպես «կոնսումատորներ», այսինքն՝ ժամանակ անցկացնել ակումբների հյուրերի հետ՝ խրախուսելով նրանց ավելի շատ գումար ծախսել։
Baza-ի տեղեկություններով՝ Թուրքիայի ոստիկանությունը կանանց մեղադրում է մարմնավաճառության մեջ։
Թարգմանությունը՝ Էմմա Չոբանյանի
