19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Թուրքիան հաշտության փորձեր է ձեռնարկում ԵՄ երկրների հետ՝ պատժամիջոցների սպառնալիքի ֆոնին․ Bloomberg
Քաղաքականություն
01.12.2020 | 12:39
Դեկտեմբերի 10-ին կայանալիք ԵՄ գագաթնաժողովի նախաշեմին, որի ընթացքում պետք է քննարկվի նաև Թուրքիայի դեմ պատժամիջոցներ սահմանելու հարցը, Թուրքիան հաշտության փորձեր է ձեռնարկում Եվրամիության երկրների հետ, փորձում լուծել նրանց հուզող հարցերը: Այսպես՝ Անկարան իր Oruc Reis հետախուզական նավը դուրս է բերել Միջերկրական ծովի արևելյան հատվածից և հարգանք է ցուցադրում ոչ մահմեդական փոքրամասնությունների նկատմամբ, գրում է Bloomberg-ը։
Ըստ հրապարակման՝ այս ժեստերն այն քայլերի լայն շրջանակի մի մասն են, որոնք ուղղված են ԵՄ երկրների հետ մթնոլորտի բարելավմանը մինչ դեկտեմբերի 10-ը կայանալիք գագաթնաժողովը, որի ժամանակ քննարկվելու է նաև արձագանքը Թուրքիայի ծովային գործողություններին այն ջրերում, որոնք պատկանում են նաև միության անդամ Կիպրոսին և Հունաստանին։
Զգուշանալով ԵՄ հավելյալ պատժամիջոցներից՝ Թուրքիան արդեն պատրաստակամություն է ցուցաբերում՝ Հունաստանի հետ վիճելի տարածքների շուրջ բանակցություններ սկսելու և վստահության կառուցման համար։ Էրդողանը վերջերս նաև դեսպանորդ է ուղարկել Բրյուսել՝ լարվածության ապաէսկալացման համար։
Բացի այդ, ԵՄ առաջնորդները նաև ճնշում են գործադրել գերազանցապես մահմեդաբնակ Թուրքիայի վրա՝ ավելի մեծ հանդուրժողականություն դրսևորել կրոնական փոքրամասնությունների հանդեպ։ Ի պատասխան՝ Թուրքիայի նախագահի մամուլի քարտուղար Իբրահիմ Քալընը և արդարադատության նախարար Աբդուլհամիդ Գյուլը հանդիպել են ոչ մահմեդական փոքրամասնությունների կրոնական առաջնորդների և կազմակերպության ղեկավարների հետ և հավաստիացրել, որ կառավարությունը կաշխատի իրենց եկեղեցիներին, դպրոցներին և գույքին վերաբերող հարցերի լուծման ուղղությամբ։
Տաթև Ֆռանգյան
