Թրամփը պաշտոնաթող գեներալ Քիթ Քելլոգին առաջադրել է Ուկրաինայի և ՌԴ-ի հարցերով ԱՄՆ հատուկ ներկայացուցչի պաշտոնում

ԱՄՆ նորընտիր նախագահ Դոնալդ Թրամփը 80-ամյա պաշտոնաթող գեներալ Քիթ Քելլոգին առաջադրել է Ուկրաինայի և Ռուսաստանի հարցերով ԱՄՆ հատուկ ներկայացուցչի պաշտոնում։ Այս մասին Թրամփը հայտնել է իր Thruth սոցիալական ցանցում, գրում է Current time-ը։

«Ես ուրախ եմ առաջադրել գեներալ Քիթ Քելլոգի թեկնածությունը նախագահի օգնականի և Ուկրաինայի ու Ռուսաստանի հարցերով հատուկ ներկայացուցչի պաշտոնում։ Քիթը նշանավոր ռազմական և գործնական կարիերա է ունեցել, այդ թվում՝ իմ վարչակազմում ազգային անվտանգության բարձր պատասխանատու պաշտոններ է զբաղեցնել։ Նա ինձ հետ էր հենց սկզբից։ Միասին մենք խաղաղություն կապահովենք ուժի միջոցով և Ամերիկան ​​ու աշխարհը նորից անվտանգ կդարձնենք»,- գրել է Թրամփը։

Թրամփի առաջին նախագահության ընթացքում Քելլոգը ծառայել է Ազգային անվտանգության խորհրդում, եղել է այն ժամանակվա փոխնախագահ Մայք Փենսի ազգային անվտանգության հարցերով խորհրդականը:

2024 թվականի հունիսին հաղորդվում էր, որ Քելլոգը և Ֆրեդ Ֆլեյցը, որը Թրամփի օրոք եղել է ԱՄՆ Ազգային անվտանգության խորհրդի գործադիր քարտուղարը, առաջարկել են պատերազմը դադարեցնելու ծրագիր՝ հիմնված «գոյություն ունեցող առաջնագծի» վրա։ Պլանը նաև ենթադրում է, որ եթե բանակցությունները մերժվեն, Կիևը կարող է զրկվել Վաշինգտոնի ռազմական օգնությունից, իսկ Ռուսաստանի մերժումը կհանգեցնի Ուկրաինային օգնության ավելացմանը։

Ներկայում ԱՄՆ-ում ուկրաինական հակամարտության կարգավորման հարցերով հատուկ ներկայացուցչի պաշտոն չկա, սակայն սպասվում է, որ Թրամփը կստեղծի այն։

Թարգմանությունը՝ Էմմա Չոբանյանի