Պետք է մեջտեղ բերենք Ադրբեջանի կողմից իրականացվող ցեղասպանական քաղաքականությունը․ Արմեն Մարուքյան

«Վերջին շրջանում շատ էր խոսվում գոյաբանական հարցի մասին, ցեղասպանության վտանգի մասին: Պատմաբաններս հիմնավորված ներկայացնում էինք այն թեզը, որ հանձինս մեր երկու հարևան պետությունների՝ Թուրքիայի և Ադրբեջանի, մենք գործ ունենք ցեղասպան պետությունների հետ: Այս մասին այսօր կայացած ասուլիսում նշեց ՀՀ ԳԱԱ պատմության ինստիտուտի հայկական հարցի և հայոց ցեղասպանության պատմության բաժնի վարիչ, պատմական գիտությունների դոկտոր, պրոֆեսոր Արմեն Մարուքյանը՝ անդրադառնալով հարցին, թե ռազմական գործողությունները շուրջ մեկ ամիս շարունակվում են, և այս ընթացքում արտաքին լսարանին մեր կողմից ներկայացված ուղերձում արդյո՞ք կարևոր օղակ դարձավ Թուրքիայի կողմից ցեղասպանությունը շարունակելու, վարձկաններին ներգրավելու հարցը:

«Թուրքիան ահաբեկիչների հետ մշտապես գործակցող պետություն է ու նրանց օգտագործում և ուղղորդում է հայ բնակչության դեմ, այդ նույն ահաբեկիչներին հիմա տեղափոխում է արցախյան ռազմաճակատային գոտի… Սա ցեղասպանական ծրագրի, պանթյուրքիստական ծրագրի շարունակականությունն է, և ես կարծում եմ, որ մեր ԱԺ-ն պետք է ավելի հստակ իրավաքաղաքական գնահատական տա»,- ասաց պատմաբանը՝ ընդգծելով, որ պետք է հստակ անդրադարձ կատարվի ոչ միայն Թուրքիայի, այլև հենց Ադրբեջանի կողմից իրականացրած ցեղասպանական գործողություններին:

«Այս պահին Թուրքիան և Ադրբեջանը խոսքից անցել են գործի, և սա ոչ այլ ինչ է, քան իսկապես գոյաբանական կռիվ, բայց միջազգային հանրությանը ներկայացնելու տեսակետից հենց Ադրբեջանի Հանրապետության կողմից հայ բնակչության նկատմամբ իրականացված ցեղասպանական գործողությունները պետք է հստակ իրավաքաղաքական գնահատական ստանան»,- նշեց Մարուքյանը:

Մանրամասները՝ տեսանյութում: