24.04.2026 | 16:22
Սա տարածքային պահանջ չէ, իրավունքների հետևից գնալ է. Նինա Կարապետյանց․ ՏԵՍԱՆՅՈՒԹ
Գյումրիի «Երեխաների տուն» մանկատան կորոնավիրուսով հիվանդ երեխաներն ու աշխատակիցներն ապաքինվել են
18.09.2020 | 18:50
Գյումրիի «Երեխաների տուն» մանկատան կորոնավիրուսով վարակված երեխաներն ու աշխատակիցներն առողջացել են, հաստատությունում վիրուսի նոր դեպքեր չեն գրանցվել։
Հիշեցնենք, որ ավելի վաղ մանկատանը կորոնավիրուսով վարակման դեպքեր էին հայտնաբերվել 6 երեխայի ու 7 աշխատակցի մոտ։ Նրանք հոսպիտալացվել էին Երևանի բուժհաստատություններում՝ բացառությամբ 3 աշխատակցի, որոնք ինքնամեկուսացել էին տանը։ Վարակված աշխատակիցներից 4-ն էլ հիվանդանոցում խնամում էին երեխաներին։
Աշխատանքի և սոցիալական հարցերի նախարարի մամուլի խոսնակ Սոնա Մարտիրոսյանը Factor.am-ի հետ զրույցում տեղեկացրեց, որ բոլոր երեխաները՝ բացի մեկից, 10 օր առաջ դուրս են գրվել հիվանդանոցից և որևէ մեկի մոտ խնդիր չկա։
«Կրկնակի թեստավորում է կատարվել, բոլորի մոտ բացասական արդյունք է եղել։ Բայց քանի որ երեխաներից մեկն ունի քրոնիկ հիվանդություն, որի համար իրեն ցուցում է տրված այս պահին բժշկական հսկողության տակ լինել, իրեն թողել ենք «Արաբկիր» բժշկական կենտրոնում։ Ինքը դեռ այնտեղ է, մյուս երեխաներն ու աշխատակիցները կրկնակի բացասական թեստերով վերադարձել են արդեն հաստատություն»,- ասաց Սոնա Մարտիրոսյանը։
Այս պահի դրությամբ, մանկատանը դրական թեստով անձինք չկան։ Հիվանդանոցում գտնվող երեխան ևս ապաքինվել է կորոնավիրուսից։
Սոնա Մարտիրոսյանը նաև նշեց, որ հաստատությունում վերջին թեստավորումը կատարվել է սեպտեմբերի 10-ին, ևս մեկը, ամենայն հավանակությամբ, կկատարվի սեպտեմբերի 21-ին, երբ փոխվի աշխատակիցների հերթափոխը։
Հավելենք նաև, որ «Երեխաների տուն» մանկատունը շարունակում է աշխատել փակ ռեժիմով։ Հաստատությունում խնամվում են առողջական խնդիրներ ունեցող երեխաները։
Էմմա Չոբանյան
