Ձեր մի տղան ծառայել է Երևանում, մյուսն էլ դիրքեր չի բարձրանում. Թովմասյանը՝ Խունդկարյանին. ՏԵՍԱՆՅՈՒԹ

ԱԺ այսօրվա նիստում ՍԴ դատավորների ընտրության հարցի քննարկման ժամանակ  «Իմ քայլը» պատգամավորական խմբակցության պատգամավոր Թագուհի Թովմասյանը հարց ուղղեց ՍԴ դատավորի թեկնածու Երվանդ Խունդկարյանին. «Դուք և Ձեր որդիները ապրում եք Երևանում, բայց Ձեր որդիներից մեկը իր ժամկետային զինվորական ծառայությունն անցկացրել է Երևանում: Մյուս որդին, որը հիմա ծառայում է, նորից, ինձ հասած տեղեկություններով, գտնվում է արտոնյալ պայմաններում և դիրքեր չի բարձրանում՝ այն պարագայում, երբ ինքներդ Մեղրիում եք ծառայել: Կուզենայի իմանալ, թե ինչպե՞ս է ստացվել, որ ապրելով Երևանում, Ձեր որդին ծառայել է Երևանում»։

Խունդկարյանը նշեց, որ այդ տեղեկությունը չի համապատասխանում իրականությանը։

«Իմ ավագ որդին ծառայել է ազգային բանակում և ծառայությունն անցկացրել է պատվո պահակախմբի համապատասխան ստորաբաժանումում: Երկրորդ որդիս ներկայում գտնվում է պարտադիր ժամկետային զինվորական ծառայության մեջ, որն անցկացնում է ՀՀ տարածքում տեղակայված զորամասերից մեկում։ Եվ ասեմ նաև, որ ծառայությունն իրականացնում է նույն մեթոդներով ու սկզբունքներով, ինչպես բոլոր զինվորները, և ներկա պահին՝ արդեն 1.5 ամիս է, գտնվում է դիրքերում: Այնպես որ՝ այն տեղեկությունը, որ ունեք, իրականությանը չի համապատասխանում»,- մասնավորապես նշեց Խունդկարյանը։

Մանրամասները՝ տեսանյութում։