Ստահոդ լուրերի շատ հեղինակներ երեկոյան ժամանակ են անցկացնում դատավորների հետ․ հիմնավոր լուծումներ են պետք․ Բաբաջանյան. ՏԵՍԱՆՅՈՒԹ

«Կարող եմ տասնյակ հարցումներ վկայաբերել, որոնք վկայում են, որ Հայաստանի հասարակությունը չի վստահում Հայաստանի դատական իշխանությանը, ավելին, համարում է, որ դատական իշխանությունը թաթախված է հանցավոր կապերի մեջ, արատավորված է կոռուպցիոն մեխանիզմներով, նախկին իշխանությունների հետ ունի շատ առնչություններ և այս պահին դիրքավորվել է Հայաստանի պետականության դեմ»,- այս մասին ԱԺ պետաիրավական հարցերի մշտական հանձնաժողովի նիստում ասաց ԱԺ պատգամավոր Արման Բաբաջանյանը՝ ՀՀ քաղաքացիական օրենսգրքում փոփոխություններ կատարելու մասին օրենքի նախագծի քննարկման ժամանակ, որով առաջարկվում է բարձրացնել զրպարտության և վիրավորանքի համար նախատեսված փոխհատուցման չափը:

Պատգամավորի կարծիքով՝ ստահոդ լուրերի տարածումն ու զրպարտություններն իրականացվում են դատական իշխանության հովանավորության ներքո:

Արման Բաբաջանյանի խոսքով՝ պետք է գնալ դատական համակարգի «վիրահատական միջամտության» և դատական համակարգի առողջ հատվածի վրա հիմնվելով՝ գնալ համակարգի առողջացմանը:

«Այսպիսի փոքր, հատվածական միջոցներով հաջողության հասնել հնարավոր չէ, որովհետև այն մարդիկ, ովքեր ձեր նշած հանցագործությունները գործում են, այնքան փող ունեն, որ նախատեսված դրամական փոխհատուցումներն էլ կտան, միայն թե ստահոդ տեղեկությունները հանրայնացնելու առիթը բաց չթողնեն»,- նշեց Բաբաջանյանը՝ հավելելով, որ ստահոդ լուրերի շատ հեղինակներ երեկոյան ժամանակ են անցկացնում դատավորների հետ, հիմնավոր լուծումներ են պետք:

Մանրամասները՝ տեսանյութում։