Գյումրիի ծերանոցի՝ կորոնավիրուսով հիվանդ շահառուներն ու աշխատակիցները ապաքինվել են

Գյումրիի տարեցների տուն-ինտերնատի՝ կորոնավիրուսով հիվանդ բոլոր  շահառուներն ու աշխատակիցները առողջացել են։ Այս մասին մեզ  հետ զրույցում հայտնեց Հայկական Կարմիր Խաչի ընկերության լրատվական ու լուսաբանման բաժնի վարիչ Նունե Գրիգորյանը։ Մայիսի 1-ից, հիշեցնենք, Հայկական Կարմիր Խաչն է ստանձնել խնամքի կենտրոնի կառավարումը, և այն այժմ կոչվում է Գյումրու շուրջօրյա խնամքի կենտրոն։

«Այլևս հիվանդներ չունենք, վարակվածներ չունենք, մեկուսացումից դուրս են եկել, բոլոր աշխատողներն էլ արդեն անցել են գործի։ Բոլորը թեստավորվում են մշտապես, բոլորի թեստերը բացասական է»,- ասաց Նունե Գրիգորյանը։ Նա նաև հավելեց, որ խնամքի կենտրոնը շարունակում է աշխատել փակ ռեժիմով։

«Համագործակցելով նախարարության ու համաճարակաբանների հետ՝ դեռևս  մեկուսացման ռեժիմը պահպանվում է, մինչև արտակարգ դրության ավարտը։ Այդ ժամանակ արդեն պարզ կլինի կշարունակվի, թե՝ ինչպես կլինի»,- ասաց Նունե Գրիգորյանը։

Հիշեցնենք, որ  հուլիսին  Գյումրիի տարեցների տուն-ինտերնատում կորոնավիրուսի բռնկում էր տեղի ունեցել։  Ի սկզբանե խնամքի կենտրոնի 151 շահառուից կորոնավիրուս էր հաստատվել  56-ի, 66 աշխատակցից էլ՝ 12-ի մոտ։ 37 հիվանդ հոսպիտալացվել էր, որոնցից 5-ի վիճակը ծանր էր։ Կենտրոնի  5 շահառու էլ  մահացել է։

Ընդհանուր առմամբ, Շիրակի մարզում նկատվում է կորոնավիրուսի տարածման տեմպերի նվազում, վարակի նոր օջախներ չկան։ Վերջին տվյալներով՝ Գյումրու ինֆեկցիոն հիվանդանոցում կորոնավիրուսով 19 հիվանդ է բուժվում, նրանցից 18-ը՝ Շիրակի մարզի բնակիչ է։

Մարզում   տնային ինքնամեկուսացման ցուցում ունի 443 քաղաքացի, նրանցից 93-ի մոտ դրական ախտորոշում կա՝ հիվանդության անախտանիշ ընթացքով։

Կորոնավիրուսից առողջացել և Գյումրու ինֆեկցիոն հիվանդանոցից մինչ օրս դուրս է գրվել Շիրակի մարզի 514 բնակիչ։ 54 հիվանդներ տեղափոխվել են մայրաքաղաք: Մարզում արձանագրվել է մահվան 37 դեպք:

Էմմա Չոբանյան