16.06.2026 | 00:58
ԱԱ-2026․ Բելգիան խուսափեց պարտությունից Եգիպտոսի դեմ խաղում․ ՏԵՍԱՆՅՈՒԹ
Շիրակում կորոնավիրուսից մահվան նոր դեպք կա․ կորոնավիրուսային հիվանդության 13 նոր դեպք է հաստատվել
05.08.2020 | 14:44
Շիրակի մարզում կորոնավիրուսից մահվան մեկ նոր դեպք է գրանցվել։ Մահացողը կին է, նա Գյումրիի ինֆեկցիոն հիվանդանոցից տեղափոխվել էր Երևան, որտեղ էլ մահացել է։ Այս մասին Factor.am-ին հայտնեցին Շիրակի մարզպետարանի տեղեկատվության ու հասարակայնության հետ կապերի բաժնից։
Ընդհանուր առմամբ, մարզում արձանագրվել է կորոնավիրուսից մահվան 36 դեպք։
Ավելացել է նաև Երևանում բուժվող ծանր հիվանդների թիվը։ Մայրաքաղաքում այժմ 53 հիվանդ է բուժում ստանում։
Շիրակի մարզպետարանի հրապարակած տվյալներով՝ Գյումրու ինֆեկցիոն հիվանդանոցում կորոնավիրուսով մարզի 37 բնակիչ է բուժվում։
Մարտի 1-ից մինչ օրս Շիրակի մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 7․914 նմուշառում, մայիսի 12-ից օգոստոսի 4-ը ներառյալ Գյումրիում իրականացվել է 6․560 նմուշառման հետազոտություն։ Օգոստոսի 4-ին հաստատվել է կորոնավիրուսային հիվանդության 13 նոր դեպք։
Մարզում, այսօրվա դրությամբ, տնային ինքնամեկուսացման ցուցում ունի 564 քաղաքացի, նրանցից 131-ի մոտ դրական ախտորոշում կա՝ հիվանդության անախտանիշ ընթացքով։ Նրանց հսկողությունն իրականացվում է առողջության առաջնային օղակի կողմից։
Նշենք, որ կորոնավիրուսի բռնկման նոր օջախներ մարզում չկան, վարակի տարածման տեմպերը, ընդհանուր առմամբ, նվազում են։ Վարակի վերջին բռնկումները Գյումրիի տարեցների տուն-ինտերնատում ու Նանսենի անվան գիշերօթիկ հաստատությունում էին եղել, սակայն այստեղ իրավիճակը կայունանում է։
Կորոնավիրուսից առողջացել և Գյումրու ինֆեկցիոն հիվանդանոցից մինչ օրս դուրս է գրվել Շիրակի մարզի 474 բնակիչ։
Էմմա Չոբանյան
