Համոզվա՞ծ ենք, որ այդ կեղծ տեղեկությունների հեղինակները չարամիտ հայեր չեն. Նիկոլ Փաշինյան. ՏԵՍԱՆՅՈՒԹ

Մեր հանրության մեդիագրագիտությունը մեծ տեմպերով զարգանում է և քաղաքացիներն իրենք ավելի ու ավելի են կարողանում տարբերել տեղեկատվությունը ապատեղեկատվությունից: Այս մասին կառավարության նիստին հայտարարեց ՀՀ վարչապետ Նիկոլ Փաշինյանը:

«Կարծում եմ՝ նաև հանրային հակազդեցության միջոցներն ամենաարդյունավետն են: Իհարկե, պետք է քննարկենք, թե ազգային անվտանգության տեսակետից ինչ մարտահրավերներ են առաջանում, այդպիսի վերլուծական աշխատանք արվում է: Պետք է տեսնել, թե ինչպիսի քայլեր կառավարությունը կարող է կամ պիտի ձեռնարկի այս առումով, բայց, իհարկե, առանց մեզ համար սկզբունքային գծերն անցնելու, որովհետև խոսքի ազատությունը, ժողովրդավարությունը մեզ համար առանցքային արժեքներ են: Դա, իհարկե, չի նշանակում, որ պետք է չտեսնելու տանք ազգային անվտանգության սպառնալիքները և պետք է հրաժարվենք դրանց հակազդել ու կառավարել:

Հատկապես սահմանային իրավիճակի լարման պարագայում, դա կրկնակի, եռակի բացասական ազդեցություն է ունենում, և հանրությունն էլ դա տեսնում է: Ես ուզում եմ ասել, որ կիրակի օրվանից մենք հանրային հսկայական հակազդեցության ալիք ենք տեսնում, կարծում եմ, որ այդ ալիքը շատ արդյունավետ է, ինչն օգնում է նաև մարդկանց մեդիագրագիտության մակարդակի բարձրացմանը:

Այսօր կան կեղծ օգտատերեր, կեղծ տեղեկատվություն, համոզվա՞ծ ենք արդյոք, որ այդ բոլոր կեղծ տեղեկատվությունների հեղինակները չարամտորեն կամ ոչ չարամտորեն ՀՀ քաղաքացիներ են: Երբ ասում եմ՝ ազգային անվտանգության հարցեր, հենց սա նկատի ունեմ, որովհետև այդ ռեսուրսը կարող է օգտագործվել օտարերկրյա ծառայությունների կողմից: Սա շատ լուրջ մարտահրավեր է, որով մեր մարմինները զբաղվում են, և այդ աշխատանքը հանրային քննարկման հարց չի»,- ընդգծեց վարչապետը:

Մանրամասները՝ տեսանյութում: