«Աննախադեպ երևույթ է, այսպիսի իրավիճակ չենք տեսել»․ Սամվել Բալասանյանը՝ Գյումրիում հեղեղումների պատճառ դարձած տեղումների մասին. ՏԵՍԱՆՅՈՒԹ

Գյումրիում երեկ տեղի ունեցածն աննախադեպ երևույթ էր։ Այսօր հրավիրված մամուլի ասուլիսում ասաց Գյումրիի քաղաքապետ Սամվել Բալասանյանը՝ ներկայացնելով նախօրեին տեղացած հորդառատ անձրևի ու կարկուտի հետևանքով քաղաքում ստեղծված իրավիճակը։

Քաղաքապետը նշեց, որ մեծ քանակությամբ տեղումներ են գրանցվել, ջրի հոսքը շատ ավելի մեծ ծավալով է եղել, քան խողովակները կարող էին տանել։

«Հիդրոմեդ ծառայությունից այսօր տվյալներ եմ վերցրել, ըստ վիճակագրության՝ հուլիսին պետք է լինեին 46 մմ տեղումներ, բայց մեկ օրվա ընթացքում եղել է 81 մմ։  170 տարվա իրենց գործունեության մեջ սա աննախադեպ երևույթ էր։ Ինձ համար ևս աննախադեպ էր, այս քաղաքում բնակվել եմ, այս իրավիճակը երբեք չենք տեսել»,- ասաց Սամվել Բալասայանը։

Ըստ նրա՝ այն փողոցներում, որոնք անցյալ տարի կառուցվել են ՎԶԵԲ-ի ծրագրով ու շահագործման հանձնվել, ջրահեռացման համակարգը լավ է գործել։

Քաղաքի 5 կետերում խցանումները են եղել։ «5 տեղ էր խցանումը, 4-ում շատ արագ բացեցինք։ Կայարանամերձ հրապարակն ընդգրկված է ՎԶԵԲ-ի ծրագրում, այդ հարցը կլուծենք։ Մայր Հայաստանում գնում է շինարարություն։ Տրդատ Ճարտարապետ փողոցում, երբ Անի թաղամաս մտնենք, հարցը կլուծենք։ Կամուրջի հետ կապված խցանում էր եղել, սառցաբեկորները եկել էին, բայց հերոսական ջանքերով կարողացանք բացել։ Երեկվա դեպքը աննախադեպ էր նաև նրանով, որ կարկուտ եկավ, սառցաբեկորներ առաջացան և փակեցին ջրատար անցքերը։ Տեսաք, որ փոքրիկ նավակով մոտեցան, հեռացրեցին, ազատվեցինք այդ իրավիճակից»,- ասաց Սամվել Բալասանյանը։

Հորդառատ անձրևի ու կարկուտի պատճառով տուժել են ինչպես քաղաքի ենթակառուցվածքները, այնպես էլ բնակիչները։ Քաղաքապետը տեղեկացրեց, որ հատկապես Ավտոկայան տնակային թաղամասում են բնակիչները խնդիրների առաջ կանգնել։ Քաղաքապետարանում խորհրդակցություն է անցկացվել, հանձնարարականներ են տրվել՝ եղած վթարները արագ վերացնելու համար։ Վնասների չափի մասին ամբողջական տվյալները պարզ կլինեն ավելի ուշ, արդեն վերլուծություն է կատարվում։

Սամվել Բալասանյանը խոստացավ, որ մասնավոր հատվածի, տնակների, բազմաբնակարան շենքերի խնդիրները կլուծվեն, բնակիչներին անպայման կտրվի օգնություն։

«Խորհրդակցության ժամանակ ասացին, որ բնակիչներ են եկել Ավտոկայան թաղամասից, ընդունեցինք։ Հանձնարարել եմ համապատասխան բաժնի աշխատակիցներին՝ գնան, ուսումնասիրեն։ Անելու ենք ամեն ինչ բնակիչների համար, ինչ հնարավորություն կա։ Հրավիրելու ենք ավագանու արտահերթ նիստ, ցուցաբերենք ֆինանսական օգնություն։ Բայց նախ ուսումնասիրենք, հասկանանք, դրանից հետո վերլուծություն կատարելով՝ ներկայացնենք ավագանու նիստին։ Դրա համար պետք չի շտապել»,- ասաց Գյումրիի քաղաքապետը։

Նա հավելեց, որ եթե համայնքի ուժերից վեր լինի խնդիրների լուծումը, կդիմեն Կառավարությանը։

Էմմա Չոբանյան