ԵՄ-Հայաստան համաձայնագիրը ստորագրելով՝ իշխանությունն ընդունեց, որ մենք ճիշտ ենք ԵՏՄ-ից դուրս գալու անհրաժեշտության առթիվ. Արամ Սարգսյան

ԱԺ «Ելք» խմբակցության պատգամավոր, «Հանրապետություն» կուսակցության նախագահ Արամ Սարգսյանը Factor.am-ի հետ զրույցում համոզմունք է հայտնում, որ չնայած Հայաստանի իշխանությունը հայտարարում է, թե դեմ է ԵՏՄ-ից դուրս գալու իրենց առաջարկին, Հայաստան-ԵՄ համաձայնագիրը ստորագրելով վերջինս ընդունեց, որ ԵՏՄ-ից դուրս գալու առթիվ «Ելք»-ի առաջարկը ճիշտ է:

«Իրենք այս համաձայնագիրը ստորագրելով՝ ընդունեցին, որ մենք ճիշտ ենք»,- նշեց Սարգսյանը: Նրա խոսքերով՝ իշխանությունն օգտվեց «մինիմալից», որովհետև վախենում է Ռուսաստանի շանտաժից:

Արամ Սարգսյանը կարևոր է համարում այսօր խորհրդարանում անցկացված լսումները ԵՏՄ-ին Հայաստանի անդամակցությունը դադարեցնելու առթիվ, չնայած նրան, որ «Ելք»-ի առաջարկը չի կարող իրագործվել, քանի որ այն չունի խորհրդարանական մեծամասնության աջակցությունը: «Ասել, որ ոչինչ ինձանից կախված չի ու ոչինչ չանելը համարում եմ կոպիտ սխալ»,- ասաց Արամ Սարգսյանը՝ հավելելով, թե «փոքրամասնություն լինելը արգումենտ չէ, որ սխալ ես»:

Հայաստանի նախկին վարչապետ Արամ Սարգսյանը բերելով վերջին տարիներին Հայաստանում օտարերկրյա ներդրումների նվազման ցուցանիշները՝ տեսակետ է հայտնում, որ Հայաստանում նեդրումներ չեն կատարվում, ԵՏՄ-ի պատճառով: «Եթե պայմանները լավացել են, բայց ներդրումներ չկան, պատճառը ԵՏՄ-ն է, որտեղ ոչ ոք չի ուզում ներդրում անել»,-ասաց նա՝ մատնանշելով, որ անգամ Հայաստանի իշխանավորներն ու նրանց մերձավորներն այսօր գերադասում են իրենց գումարները ներդնել ոչ թե ԵՏՄ-ում, այլ Գերմանիայում կամ ԱՄՆ-ում:

Ինչ վերաբերում է Հայաստանի նախագահ Սերժ Սարգսյանի՝ Բրյուսելում «Ազատություն» ՌԿ-ին տված հարցազրույցում արած հայտարարությանը, թե «երբեք կես բառ անգամ չեմ լսել Ռուսաստանի որևէ ղեկավարից, հատկապես նախագահ Պուտինից, որն իր մեջ կշտամբանք պարունակի Եվրամիության հետ մեր համագործակցելու առումով», Արամ Սարգսյանն ընդգծում է, դա անկեղծ պատասխան էր, սակայն «ուղիղ որևէ ղեկավար չի ասում, այ էնտեղ որ գնաս, քեզ այսպես կարվի: Դրա մասին խոսում են քաղաքագիտական ինստիտուտները»:

Մանրամասները դիտեք Արամ Սարգսյանի հետ Factor.am-ի հարցազրույցում:

Մարինե Խառատյան