06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Ոստիկանները ապօրինի ձեռնարկատիրական գործունեության դեպքեր են բացահայտել
Հասարակություն
12.10.2026 | 19:32
ՆԳՆ ոստիկանության ծառայողները Արագած և Դարբնիկ գյուղերում ապօրինի ձեռնարկատիրական գործունեության վերաբերյալ երկու դեպք են բացահայտել։
Ոստիկանության հաղորդմամբ՝ սեպտեմբերի 28-ին Համայնքային ոստիկանության Վաղարշապատի բաժինը տեղեկություն է ստացել, որ Արագած գյուղի 56-ամյա բնակիչն ու նրա 30-ամյա որդին ձեռք են բերում և վաճառում առանց համապատասխան մակնշման ալկոհոլային խմիչքներ ու ծխախոտ, ինչպես նաև ապօրինի վաճառում են դիզվառելիք։
Տեղեկությունը ստուգելու նպատակով ոստիկանները մեկնել են նշված հասցե։ Տան բակում՝ տեսանելի հատվածում, հայտնաբերվել են դիզվառելիքով լցված տարաներ։ 30-ամյա տղամարդը ձերբակալվել և տեղափոխվել է Վաղարշապատի բաժին։
Ոստիկանության փոխանցմամբ՝ տղամարդը բացատրական աշխատանքի ընթացքում հայտնել է, որ տանը և կից շինություններում կան վաճառքի համար նախատեսված՝ առանց համապատասխան մակնշման ալկոհոլային խմիչքներ ու ծխախոտ։
Քրեական վարույթի շրջանակում կատարված զննությամբ հայտնաբերվել են 10-լիտրանոց 80 տարա՝ ընդհանուր 800 լիտր դիզվառելիքով, 120 տուփ տարբեր տեսակի ծխախոտ և 7 շիշ կեղծ օղի։ Կատարվում է նախաքննություն։
Նույն օրը ապօրինի ձեռնարկատիրական գործունեության վերաբերյալ տեղեկություն է ստացվել նաև Համայնքային ոստիկանության Մասիսի բաժնում։ Ըստ հաղորդման՝ Դարբնիկ գյուղի խանութներից մեկում կեղծ օղի է վաճառվում։
Ոստիկանները խանութում հայտնաբերել են առանց համապատասխան մակնշման 39 շիշ օղի։ Խանութի 70-ամյա սեփականատերը ձերբակալվել և տեղափոխվել է Մասիսի բաժին։ Կազմված փաստաթղթերը ներկայացվել են նախաքննական մարմին։
ՆԳՆ ոստիկանությունը հորդորում է զերծ մնալ ապօրինի ձեռնարկատիրական գործունեությունից՝ հիշեցնելով, որ այն քրեորեն պատժելի արարք է։
