24.02.2026 | 22:59
Վաշինգտոնը ձգտում է ավարտել Ռուսաստանի և Ուկրաինայի միջև պատերազմը մինչև հուլիսի 4-ը՝ ԱՄՆ Անկախության օրը. Bloomberg
Կորոնավիրուսից մահվան 3 նոր դեպք Շիրակում․ մարզում վարակվածների թիվն ավելացել է
29.06.2020 | 14:29
Շիրակի մարզում կորոնավիրուսից մահացածների թիվն ավելացել է՝ հասնելով 21-ի։ Երեք օրվա ընթացքում մահերի թիվն ավելացել է երեքով․ նրանք մահացել են Գյումրիում։
Մահացածներից մեկը 1952թ․ ծնված տղամարդ է, մյուսը՝ 1935թ․ ծնված տղամարդ, երրորդը 1931-ին ծնված կին։ Երեքն էլ ունեցել են ուղեկցող խրոնիկ հիվանդություններ։ Այս մասին Factor.am-ին փոխանցեցին Շիրակի մարզպետարանի տեղեկատվության և հասարակայնության հետ կապերի բաժնից։
Մարզում ավելացել է նաև կորոնավիրուսով հիվանդների թիվը։ Ըստ Շիրակի մարզպետարանի հրապարակած տվյալների՝ Գյումրու ինֆեկցիոն հիվանդանոցում կորոնավիրուսով 89 հիվանդ է բուժվում, նրանցից 86-ը Շիրակի մարզի բնակիչ է։
Նշենք, որ Գյումրի ինֆեկցիոնն ունի 100 մահճակալ, որից 89-ն այժմ զբաղված է։ Այս պահին մարզն ունի ռեանիմացիոն ու տրիաժային ծառայության կարիք, հարցի վերաբերյալ առաջարկներն ուղարկվել են Առողջապահության նախարարություն։
Հունիսի 28-ին մարզում հաստատվել է կորոնավիրուսային հիվանդության 10 նոր դեպք։ 37 հիվանդներ տեղափոխվել և բուժում են ստանում Երևանում։
Մարզում, այսօրվա դրությամբ, տնային ինքնամեկուսացման ցուցում ունի 969 քաղաքացի, նրանցից 214-ի մոտ դրական ախտորոշում կա՝ հիվանդության անախտանիշ ընթացքով։ Նրանց հսկողությունն իրականացվում է առողջության առաջնային օղակի կողմից։
Մարտի 1-ից մինչ օրս Շիրակի մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 4․174 նմուշառում, մայիսի 12-ից հունիսի 28-ը ներառյալ Գյումրիում իրականացվել է 2․820 նմուշառման հետազոտություն։
Միաժամանակ, առողջացել և հիվանդանոցից մինչ օրս դուրս է գրվել Շիրակի մարզի 263 բնակիչ։
Էմմա Չոբանյան
