29.04.2026 | 23:06
Վանաձորում կանխվել է սպանության փորձ, ձերբակալվել է զինված խումբ. ՆԳՆ
«Մաեստրո» խորագրով հերթական վարպետաց դասը վարել է Դմիտրի Սիտկովեցկին
Մշակույթ
18.06.2020 | 22:41
Հայաստանի պետական սիմֆոնիկ նվագախմբի «Մաեստրո» խորագրով վարպետաց դասերի շրջանակներում հերթական պարապմունքը վարել է աշխարհահռչակ ջութակահար և դիրիժոր Դմիտրի Սիտկովեցկին՝ տեղեկացնում է նվագախմբի մամուլի պատասխանատու Լիլիթ Գրիգորյանը։
Վարպետաց դասը Դմիտրի Սիտկովեցկին վարել է Հայաստանի պետական սիմֆոնիկ նվագախմբի ջութակահար Դիանա Մեսրոպյանի հետ‚ իսկ բազմաթիվ երաժիշտներ հետևել են‚ լսել մեծ ջութակահարի մեկնաբանությունները‚ խորհուրդները։ Առցանց դասի ընթացքում Դիանա Մեսրոպյանը կատարել է Յոհան Սեբաստիան Բախի Ջութակի սոնատ թիվ 2-ը։
Դասը նախ սկսվել է Դմիտրի Սիտկովեցկու փոքրիկ կատարմամբ‚ առցանց ունկնդիրներն այդպիսով ծանոթացել են նրա կատարողական արվեստին։ Երաժիշտը որոշակի մանրամասներ է ներկայացրել Բախի կենսագրությունից‚ ստեղծագործական առանձնահատկություններից‚ այնուհետև անցել ջութակ նվագելու տեխնիկական նրբություններին։
Դիանա Մեսրոպյանը մեծապես տպավորված էր վարպետության դասից‚ մեծ երաժշտի հետ շփումից։ Ըստ նրա՝ հետաքրքիր էր ծանոթանալ Սիտկովեցկու դասավանդման մեթոդին‚ որոշ տեխնիկական նրբություններ է յուրացրել այդ պարապմունքի ընթացքում։
Մինչ վարպետության դասը Դիանան մանրամասն ուսումնասիրել էր Սիտկովեցկու կատարողական արվեստը‚ դիտել է նրա կատարմամբ այն նույն ստեղծագործությունը‚ որ ինքն էր ներկայացնում։ Դիանան շատ ուրախ էր լսել մեծ մաեստրոյի՝ իրեն ուղղված խսքերը. «Ոչ միայն լավ եք նվագում‚ այլև շատ լավ մտածում ու դատում եք»։ Երիտասարդ ջութակահարուհին ասում է‚ որ այս նախադասությունն իրեն անչափ ոգևորել է։
Դմիտրի Սիտկովեցկին պատասխանել է նաև ունկնդիրների առցանց հարցերին։
Հայաստանի պետական սիմֆոնիկ նվագախմբի «Մաեստրո» խորագրով վարպետաց դասերը լինելու են շարունակական‚ առաջիկայում բազմաթիվ այլ հայտնի երաժիշտներ առցանց հարթակում կհանդիպեն հայ երաժիշտների հետ՝ փոխանցելով իրենց մասնագիտական հմտությունները։
