«Տերը եկավ ու բոլորին իր տեղը դրեց. ԼՂ հարցում Ռուսաստանի հետ Թուրքիայի և Ադրբեջանի ծրագրերը տապալվեցին». Մանվել Սարգսյան

Ռազմավարական և ազգային հետազոտությունների հայկական կենտրոնի ղեկավար Մանվել Սարգսյանը Factor.am-ի հետ զրույցում համոզմունք է հայտնում, որ ՌԴ ԱԳ նախարար Սերգեյ Լավորվը Ադրբեջան ու Հայաստան էր եկել հստակ ուղերձով, որ Ռուսաստանն այլև չի փորձելու միայնակ պայմանավորվածություններ ձեռք բերել ԼՂ խնդրի լուծման ուղղությամբ ու այդ պատճառով հայտարարեց, թե ԼՂ խնդրի լուծման միակ ֆորմատը ԵԱՀԿ Մինսկի խումբն է:

«Այս այցը մեծ նշանակություն ուներ ռուսական քաղաքականության շեշտադրումները հստակեցնելու համար: Լավրովը ասաց՝ մենք չկանք ԼՂ խնդրում, գոյություն ունի Մինսկի խումբ, որոշում է Մինսկի խումբը, ամեն ինչը փաթեթով է»,-նշեց քաղաքագետը:

Մանվել Սարգսյանը համոզված է, որ Վիետնամի ԱԽՏՀ-ի գագաթաժողովում Սիրիայի խնդրի վերաբերյալ Ռուսաստանի և ԱՄՆ-ի նոր համաձայնագիրը, ստիպել է Ռուսաստանին հետ նահանջել նաև Կովկասյան տարածաշրջանում հիմնական որոշողի իր դոմինանտ դիրքերից:

«Կարևորագույն մի որոշում եղավ, որն անմիջապես ազդեց շատ ուրիշ խնդիրների վրա: Դա կատարվեց մի իրավիճակում, երբ մեծ աշխուժություն կար Թուրքիայի ու Իրանի կողմից ստեղծել կոալիցիայի պես մի բան, որը հավակնություններ ուներ բոլոր խնդիրները լուծել: Շատ ակտիվ էր Թուրքիան: Մինչև վերջերս Թուրքիայի նախագահը էնպես էր խոսում, կարծես ինքն է տեր-տիրականը ղարաբաղյան խնդրի, և ասում էր, որ նա առաջարկներ ունի Վլադիմիր Պուտինին, կառաջարկի բաներ, որից Արևմուտքում հայկական լոբբին իրեն վատ կզգա»,- ասաց քաղաքագետը:

Նրա խոսքերով՝ անգամ Ադրբեջանը սկսեց ղարաբաղյան խնդրով իր պայմանները դնել: Հանկարծակի օդից կախվեց էս ամեն ինչը. տերը եկավ ու բոլորին իր տեղը դրեց: ԼՂ հարցում Թուրքիայի և Ադրբեջանի ծրագրերը Ռուսաստանի հետ տապալվեցին: «Վիեննայի կոմիտեում ԱՄՆ-ը պարզ ու հստակ վերադարձրեց ԼՂ խնդիրը ՎԻեննայի պայմանավորվածություններին, և հետաքրքիրն այն է, որ Ռուսաստանի ներկայացուցիչը նույնն է կրնկնում: Երբ որ ԱՄՆ-ը հստակ դրեց իր դիրքորոշումը, ռուս-թուրքական և ադրբեջանական թոհուբոհը միանգամից փակուղում հայտնվեց»,- նկատեց Սարգսյանը:

Մանրամասները դիտեք Մանվել Սարգսյանի հետ Factor.am-ի հետ հարցազրույցում:

Մարինե Խառատյան