27.10.2026 | 00:08
Վարդան Մինասյանն աշխատանքի է անցել Լիբանանում
Կարանտինից բոլորս դուրս կգանք մաքուր ձեռքերով և Ջիմի Հենդրիքսի սանրվածքով. Ռուբեն Հախվերդյան
Հասարակություն
08.04.2020 | 22:33
Factor.am-ի զրուցակիցը երգիչ, երգահան Ռուբեն Հախվերդյանն է: Նա, ինչպես իր ոլորտի այլ ներկայացուցիչներ, այսօր ակումբներում հանդես գալու հնարավորություն չունի, մնացել է տանը և ինքնամեկուսացել:
-Պարո՛ն Հախվերդյան, այս օրերին դժվար չէ՞ Ձեզ համար՝ առանց ակումբներում երգելու:
-Դժվար է, լսիր, փողը պակասում է: Փաստորեն, զրկվել եմ երկամուտից և մեր սիրելի պետությունն ինձ 30 հազար թոշակ է տալիս: Կինս, որդիս, դուստրս աշխատում են…Խանութներ էլ չեմ մտնում, կարանտինի մեջ եմ: Ես այն օրինակելի մարդկանց թվում եմ, որոնք չեն խախտում սանիտարահամաճարակային կանոնները:
-Որպես քաղաքացի՝ ինչպե՞ս եք գնահատում մեր կառավարության ջանքերը՝ կորոնավիրուսի դեմ պայքարում:
-Դուք գիտեք՝ ես մեր բոլոր կառավարություններին ինչքան շատ եմ սիրում…Բոլորին անխտիր (ծիծաղում է): Ես գնահատական դնել չգիտեմ, չեմ կարողանում գնահատել, հեռուստացույցով էլ նայում եմ միայն ինչ-որ սերիալներ, բայց ռուսական և ամերիկյան որակյալ սերիալներ:
-Կորոնավիրուսից հետո աշխարհն այլևս նույնը չի լինի, համաձա՞յն եք…
-Ես կարող եմ միայն մի բան ասել՝ կարանտինից բոլորս դուրս կգանք մաքուր ձեռքերով և Ջիմի Հենդրիքսի սանրվածքով:
-Գուցե կարողանանք վերջապես գնահատել մանրուքները…Մեր սրտերում և հոգիներում, փոփոխություն կլինի՞:
-Դա արդեն գեղեցիկ կանանց գործն է…
Աննա Բաբաջանյան
