06.08.2026 | 17:57
«Կենտրոն» հեռուստաընկերության տնօրենն արձագանքել է ՀՌՀ-ի կողմից կիրառված տուգանքին
Թրամփը կարգադրել է վերանայել Ուկրաինային հատկացվող ռազմական օգնությունը
Քաղաքականություն
29.08.2019 | 12:55
ԱՄՆ նախագահ Դոնալդ Թրամփը կարգադրել է վերանայել Ուկրաինային հատկացվող ռազմական օգնությունը: Այս մասին գրում է Politico-ն՝ վկայակոչելով Սպիտակ տան բարձրաստիճան աղբյուրին:
ՌԻԱ Նովոստիի փոխանցմամբ՝ ԱՄՆ նախագահը ցանկանում է հավաստիանալ, որ Կիևին տրամադրվող գումարները լավագույնս են օգտագործվում Վաշինգտոնի շահերի տեսանկյունից:
Ըստ ամերիկյան պարբերականի՝ դրամական միջոցները կսառեցվեն, մինչև որոշվի դրանց ճակատագիրը: Իսկ հարցը պետք է լուծեն ԱՄՆ պաշտպանության նախարար Մարկ Էսպերը և ազգային անվտանգության հարցերով Թրամփի խորհրդական Ջոն Բոլթոնը:
Ավելի վաղ ամերիկյան Սենատը ընդունել էր 2020 ֆինանսական տարվա պաշտպանական բյուջեի նախագիծը, որով նախատեսվում է Ուկրաինային որպես ռազմական օգնություն 300 մլն դոլար հատկացնել:
Նշենք, որ 2014 թվականից ի վեր, ըստ Կիևում ԱՄՆ նախկին դեսպան Մարի Յովանովիչի, ԱՄՆ-ն Ուկրաինային շուրջ մեկ միլիարդ դոլար է տրամադրել՝ անվտանգությունն ամրապնդելու համար: Բացի այդ՝ ամերիկյան իշխանությունները Կիևին սպառազինություն է մատակարարել:
ՌԴ իշխանությունները բազմիցս դժգոհել են Ուկրաինային զենք մատակարարելու՝ ամերիկյան կողմի որոշման դեմ, նշելով, որ այդ քայլը կհանգեցնի Դոնբասում հակամարտության սրման:
Ուկրաինային զենքի վաճառքի դեմ արտահայտվել են նաև բազմաթիվ եվրոպական քաղաքական գործիչներ՝ դա համարելով ճգնաժամից դուրս գալու ռիսկային ուղի:
