30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Հետխորհրդային երկրների, այդ թվում՝ ՀՀ բնակիչների համար ավելի դյուրին կլինի ՌԴ քաղաքացի դառնալ
Քաղաքականություն
23.07.2019 | 13:47
ՌԴ իշխանությունները մտադիր են մեղմացնել միգրացիոն օրենսդրությունը և օտարերկրացիների ավելի լայն շրջանակի հնարավորություն ընձեռել պարզեցված կարգով ժամանակավոր բնակության և ժամանակավոր կեցության թույլտվություն ստանալ: Միաժամանակ, ըստ ՌԴ Դաշնային ժողովի պաշտոնաթերթի, ժամանակավոր բնակության թույլտվության հայտի դիտարկման ժամկետը պետք է կրճատվի՝ կես տարուց հասցնելով 4 ամսվա, իսկ ժամանակավոր կեցության թույլտվությունը պետք է դառնա անժամկետ:
Կառավարության պատրաստած համապատասխան օրինագիծը Պետդուման երրորդ ընթերցմամբ քննարկելու է այսօրվա լիագումար նիստում:
Օրինագծով նախատեսվում է, որ քվոտայից դուրս ժամանակավոր բնակության թույլտվություն կտրվի այն անձանց, որոնք ծնվել են Ռուսաստանի տարածքում, Ուկրաինայի քաղաքացի են կամ քաղաքացիություն չունեցող անձ և ունեն փախստականի կարգավիճակ կամ ժամանակավոր ապաստան ՌԴ-ում, վերաբնակվում են Ռուսաստանում մշտական բնակության համար՝ փախստականների վերաբնակության և իրավունքների պաշտպանության միջազգային պայմանագրի շրջանակում, որը կնքվել է Ադրբեջանի, Թուրքմենստանի, Լատվիայի, Վրաստանի, Հայաստանի և այլ պետությունների հետ:
Իսկ առանց նախապես ժամանակավոր բնակության թույլտվություն ստանալու ժամանակավոր կեցության թույլտվություն ստանալու իրավունք, ըստ փաստաթղթի, կարող են ստանալ մի շարք օտարերկրացիներ, այդ թվում՝ ՌԽՖՍՀ-ում ծնված և նախկինում ԽՍՀՄ քաղաքացիություն ունեցող քաղաքացիները, Ռուսաստանի տարածքում ծնված երեխաները, որոնց օտարերկրացի ծնողներն ունեն բնակության իրավունք, անձինք, որոնց ծնողները կամ երեխաներն ունեն ՌԴ քաղաքացիություն և մշտապես ապրում են այստեղ, Ռուսաստանում կես տարուց ոչ պակաս որպես որակյալ մասնագետ աշխատող օտարերկրացիները, երկրի տարածքում ապրող անձինք, որոնց ՌԴ քաղաքացիությունն ընդհատվել է (բացի ՌԴ Քրեական օրենսգրքի ծանր հանցագործությունների հոդվածներով, առաջին հերթին՝ ահաբեկչության համար դատապարտվածները), ռուսական բուհերը գերազանցությամբ ավարտած օտարերկրացիները:
Ավելի վաղ մեկնաբանելով օրինագիծը՝ Պետդումայի նախագահ Վյաչեսլավ Վոլոդինը նշել էր, որ արմատներով Ռուսաստանի հետ կապված և ռուսերենին տիրապետող անձինք, ինչպես նաև նրանք, ովքեր ՌԴ-ում բնակվող ազգականներ ունեն, այնտեղ կրթություն են ստացել և ցանկանում են աշխատել հանուն երկրի բարեկեցության, չպետք է բյուրոկրատական քաշքշուկի բախվեն: Վոլոդինը հավելել է, որ օրենսդրությունում անհրաժեշտ այս փոփոխությունները հանձնարարել է պատրաստել ՌԴ նախագահ Վլադիմիր Պուտինը:
