05.11.2024 | 12:33
Հակոբ Սիմիդյանի ճեպազրույցը՝ ՈՒՂԻՂ
Ջրային կոմիտեն այս տարի արդեն հողօգտագործողների հետ կնքել է 920 լրացուցիչ պայմանագիր, որոնց թիվն ավելանում է
Տնտեսություն
02.07.2019 | 12:19
«2018 թվականի հետ համեմատ 2019 թվականին Հայաստանում 7100 հա-ով ավելացել են ոռոգելի հողակտորները, ի հայտ են եկել նոր հողօգտագործողներ, 7100 հա-ի մեջ որոշակի թիվ են կազմում այն հողակտորները, որոնք ստվերից դուրս են եկել։ Ջրային կոմիտեն այս տարի արդեն հողօգտագործողների հետ կնքել է 920 լրացուցիչ պայմանագիր, որոնց թիվն ավելանում է, իսկ այս տարվա 6 ամիսների ընթացքում բաց է թողնվել նախորդ տարվա նույն ժամանակահատվածի 218 մլն խմ-ից 30 մլն խմ-ով պակաս ջուր: Թեև թիվը նվազեցվել է, սակայն հողօգտագործողների կողմից որևէ դժգոհություն չի արձանագրվել, հետևաբար՝ կարելի է միտում տեսնել, որ այդ 218 մլն խմ թիվը իրականությանը չի համապատասխանել»,- այս մասին այսօր հրավիրված մամուլի ասուլիսի ժամանակ ասաց ՀՀ տարածքային կառավարման և ենթակառուցվածքների նախարարության Ջրային կոմիտեի նախագահ Վարդան Մելքոնյանը՝ նշելով նախորդ տարվա համեմատ այս տարի սպառած ջրի դիմաց 6 ամսվա ընթացքում գանձվել է 24 մլն դրամով ավելի գումար՝ հասնելով 846 մլն դրամի՝ նախորդ տարվա 822 մլն դրամի փոխարեն։
«Անցյալ տարվա նույն ժամանակահատվածի հետ համեմատ այս տարի ունենք 1 մլն կՎտ/ժ-ի հոսանքի ավել ծախս, դա կարելի է բացատրել այն բանով, որ նույն ժամանակահատվածի համեմատ մենք Սևանա լճից վերցրել ենք 14 մլն խմ-ով ավելի քիչ ջուր և որոշ հատվածների ջուր հասցնելու համար մենք սպառել ենք այդ հոսանքը։ Անցյալ տարվա նույն ժամանակահատվածում Սևանից բաց է թողնվել 43,5 մլն խմ ջուր, իսկ այս տարի նույն ժամանակահատվածի համար՝ 29․5 մլն խմ ջուր, իսկ Արփա-Սևանով Սևանա լիճ ենք տեղափոխել 126 մլն խմ ջուր՝ նախորդ տարվա 122 մլն խմ-ի դիմաց»,- ասաց Վարդան Մելքոնյանը։
Խոսելով ջրամբարների լցվածության մասին՝ Տարածքային կառավարման և ենթակառուցվածքների նախարարության Ջրային կոմիտեի նախագահը նշեց, որ այսօրվա դրությամբ նախորդ տարվա նույն ժամանակահատվածի հետ համեմատ 41 մլն խմ-ով ավել ջուր կա կուտակված։
Աղավնի Սուքիասյան
