ՆԱՏՕ-ի ղեկավարությունն արևմտյան խոշոր ընկերություններին կոչ է արել պատրաստվել պատերազմի

Արևմտյան առաջատար ընկերությունները պետք է պատրաստվեն պատերազմի և հարմարեցնեն իրենց արտադրության և բաշխման շղթաները, որպեսզի ավելի քիչ խոցելի լինեն Ռուսաստանի և Չինաստանի շանտաժի դեմ, հայտարարել է ՆԱՏՕ-ի ռազմական կոմիտեի նախագահ, ծովակալ Ռոբ Բաուերը:

«Եթե մենք կարողանանք ապահովել բոլոր կենսական ծառայությունների և ապրանքների առաքումը բոլոր պայմաններում, դա կլինի մեր զսպող ուժի հիմնական մասը», – ասել է Բաուերը, որի խոսքերն է մեջբերում Reuters-ը։

Նրա խոսքով՝ հակառակորդին զսպելը ներառում է ոչ միայն ռազմական հնարավորություններ, այլ նաև պատերազմում առկա բոլոր գործիքների օգտագործումը։

«Մենք դա տեսնում ենք դիվերսիոն գործողությունների աճող թվի մեջ, Եվրոպան դա զգացել է նաև էներգիայի մատակարարման հետ կապված: Մենք կարծում էինք, որ համաձայնության ենք եկել «Գազպրոմի» հետ, բայց իրականում պայմանավորվել էինք պարոն Պուտինի հետ։ Նույնը վերաբերում է չինական ենթակառուցվածքներին և ապրանքներին: Մենք փաստացի պայմանագիր ենք կնքում Սի Ցզինպինի հետ»,- ասել է նա։

ՆԱՏՕ-ի պաշտոնյան մատնանշել է արևմտյան երկրների մեծ կախվածությունը Չինաստանի մատակարարումներից, որտեղ արտադրվում է բոլոր հազվագյուտ հողային նյութերի 60%-ը և վերամշակվում՝ 90%-ը։ Ծովակալի խոսքով՝ Չինաստանից են նաև հանգստացնող, հակաբիոտիկների, հակաբորբոքային և հիպոթենզիայի բուժման համար նախատեսված քիմիական բաղադրիչները։

«Մենք միամիտ ենք, եթե կարծում ենք, որ Կոմկուսը երբեք չի օգտագործի այս իշխանությունը։ Եվրոպայի և Ամերիկայի բիզնեսի առաջնորդները պետք է հասկանան, որ իրենց կայացրած որոշումները ռազմավարական ազդեցություն ունեն իրենց երկրների անվտանգության վրա: Գործարարները պետք է պատրաստ լինեն պատերազմի սցենարին և համապատասխանաբար հարմարեցնեն իրենց արտադրական և բաշխման շղթաները»,- ընդգծել է Բաուերը։

Թարգմանությունը՝ Տաթև Ֆռանգյանի