Մասիսի քաղաքապետը վարչապետի հետ չէր մասնակցում այգու բացման միջոցառմանը․ ՏԵՍԱՆՅՈՒԹ

Մեր հարաբերությունները զուտ աշխատանքային են՝ քաղաքապետ-մարզպետ: Մասիսում Ֆրանկոֆոնիայի այգու բացման ժամանակ Factor.am-ի հարցին՝ ինչո՞ւ Մասիսի քաղաքապետ Դավիթ Համբարձումյանը չի մասնակցում միջոցառմանը, ասաց Արարատի մարզպետ Գարիկ Սարգսյանը:

«Բոլորի հետ էլ ստացվում են աշխատանքային հարաբերություններ, եթե պատրաստ են աշխատելու»,- ասաց նա։

Factor.am-ը Գարիկ Սարգսյանից հետաքրքրվեց՝ պաշտոնակության մասին լուրերը ճի՞շտ են, ինչին մարզպետն արձագանքեց. «Այդ հարցին կարող է պատասխանել միայն վարչապետը»:

Մեր դիտարկմանը, թե ինչո՞ւ չի առաջադրվել «Քաղաքացիական պայմանագիր» կուսակցության վարչության անդամ, Գարիկ Սարգսյանն ասաց, որ ինքը դեռ 2016-ին էր հայտարարել՝ չի առաջադրվելու հաջորդ անգամ։ «Դա իմ որոշումն է եղել դեռևս 2016 թվականից։ Կուսակցական շարքերը պետք է առաջ գան, հետ գնան, մարդիկ հնարավորություն ունենան առաջադրվելու, և քանի որ տեղերը սահմանափակ են, մենք պետք է հնարավորություն տանք մեր մյուս կուսակցական ընկերներին», – ասաց նա:

Գարիկ Սարգսյանի խոսքով՝ Մասիսում Ընտանեկան մարզահամալիրի բացման համար տրամադրվել է մոտ 960 միլիոն դրամ:

«Քանի որ բարերարը Մասիսից է, ունեն հնարավորություն, փորձում են իրենց համայնքի համար լավ բան անել, ինչը ողջունելի է ու մենք շահագրգիռ կողմ ենք», – ասաց նա:

Factor.am-ը Գարիկ Սարգսյանից հետաքրքրվեց, թե հայտնի կոկորդիլոսաբուծարանի ներդրումներն ինչ փուլում են, քանի որ մինչ այս միայն քննարկվում է կոկորդիլոսի կառուցվածքը: Գարիկ Սարգսյանն ասաց, որ կարծում է՝ այդ թեման արդեն իրեն սպառել է: «Ներդրումը կատարելու է «Արմոն» ՍՊԸ-ն, և ես կարծում եմ՝ այդ թեման իրեն սպառել է»,- ասաց նա։

Մանրամասները՝ տեսանյութում:

Նարեկ Կիրակոսյան