11.12.2025 | 15:26
Որքան տեղյակ եմ` Արցախի ներդրումային հիմնադրամին է առնչվում գործը. Աբրահամյան․ ՏԵՍԱՆՅՈՒԹ
«Կոֆե՞, կենտրո՞ն, կինո՞»․ «Ոսկե ծիրանն» այս տարի տեխնիկական ու բովանդակային փոփոխություններով կներկայանա
12.06.2019 | 19:45
Այս տարի «Ոսկե ծիրան»-ը որոշակի փոփոխություններ է կրել․ փոխվել է ղեկավար կազմը: Այն համալրել են երիտասարդներ, ովքեր մեծ պատասխանատվությամբ պատրաստվում են փառատոնը կինոտոն դարձնել։
Այս մասին «Ոսկե ծիրան» միջազգային 16-րդ կինոփառատոնի մեկնարկն ազդարարող ասուլիսի ընթացքում նշեց փառատոնի հիմնադիր նախագահ Հարություն Խաչատրյանը:
Նրա խոսքով՝ փոփոխություններ են եղել նաև գերատեսչական մասով. նախարարությունների միավորման արդյունքում այսուհետ համագործակցելու են Կրթության, գիտության, մշակույթի և սպորտի նախարարության հետ: Ինչպես նախորդ տարիներին, այս տարի ևս, փառատոնի գլխավոր գործընկերը ՎիվաՍել-ՄՏՍ-ն է։
Այս տարի, փառատոնի հիմնադիր նախագահի խոսքով, ֆինանսական որոշ խնդիրներ են ունեցել։
«Մշակույթի նախարարությունը մեզ 55-57 մլն-ի փոխարեն 30 մլն է տրամադրել, քանի որ նախարարության աջակցությունը ստանալու ձևը փոխվել է։ Հիմա ոչ թե գումար են տրամադրում ներկայացրած հայտի հիման վրա, այլ՝ մրցույթի մասնակցելու արդյունքում։ Գաղափարը, թվում էր, վատը չէր, սակայն չաշխատեց։ Մենք էլ մի շարք խնդիրներ ունեցանք»,– նշեց Հրություն Խաչատրյանը։
Ըստ նրա՝ կինոփառատոնին այս տարի բանկերն էլ չեն աջակցել։
ՀՀ կրթության, գիտության, մշակույթի և սպորտի նախարարի տեղակալ Արա Խզմալյանի կարծիքով՝ անկախ տեխնիկական հարցերից, փառատոնը կարևոր է և ռազմավարական նշանակություն ունի։
««Ոսկե ծիրանն» այն նախագծերից է, որն աշխարհում բարձրացնում է երկրի վարկանիշը: Այն մեզ հնարավորություն է տալիս Հայաստանն ու հայկական մշակութային ժառանգությունն աշխարհին ներկայացնել»,-ասաց Արա Խզմալյանը:
Այս տարի «Ոսկե ծիրանի» լիամետրաժ ֆիլմերի մրցույթի ժյուրին կնախագահի ճանաչված կինոռեժիսոր Ալեքսանդր Մինդաձեն։
Փառատոնի հատուկ հյուրն էլ կլինի մեքսիկացի հանրահայտ կինոռեժիսոր, միջազգային մրցույթների դափնեկիր Կառլոս Ռեյգադասը:
Փառատոնի գործադիր տնօրեն Հասմիկ Հովհաննիսյանն էլ հավելեց, որ այս տարի նաև պաշտոնական պաստառներն են փոխվել։ Դրանք ավելի ժամանակակից և երևանյան թեմաների մեջ են լինելու։
«Կոֆե՞, կենտրո՞ն, կինո՞», «Փախած կինո գալի՞ս ես», «Սյուռ կինո գալի՞ս ես»․ մեր պաստառներն այս և այլ խորագրերով կլինեն»,– ընդգծեց Հասմիկ Հովհաննիսյանը։
Բացի այդ, «Ոսկե ծիրանն» այս տարի նաև նոր տարբերանշան ունի։ Այն մինիմալիստական է և ներկայացնում է հայերեն «Ծ» տառը՝ խորհրդանշելով հայկական ծիրանը։
Հիշեցնենք, որ «Ոսկե ծիրան» Երևանի 16-րդ միջազգային կինոփառատոնն այս տարի կանցկացվի հուլիսի 7-14-ը։
Նելլի Մելքոնյան
