Եվրոպայի լիգայի եզրափակչի շուրջ քննարկումները չեն դադարում. ադրբեջանցիներին հակահայ ռասիստ են անվանել

Նախօրեին Բաքվում անցկացված Եվրոպայի լիգայի եզրափակիչ «Արսենալ»-«Չելսի» հանդիպումից հետո «Արսենալ»-ի երկրպագուներն իրենց դժգոհությունն են հայտնել խաղի կազմակերպիչներից: Այս մասին գրում է Rusarminfo-ն:

Մինչ հանդիպման մեկնարկը՝ Բաքվում «Արսենալ»-ի ու տեղացիների միջև  վիճաբանություն է տեղի ունեցել։ Ըստ համացանցում տարածված տեղեկությունների՝ տեղացիներին դուր չի եկել այն, որ ֆուտբոլային ակումբի երկրպագուները փողոցում երգել են «Մենք եղել ենք Ղարաբաղում և ամենուր, հիմա մեկնում ենք Բաքու՝ Եվրոպան տուն բերելու»:

Ռուսաստանից Բաքու ժամանած մարզական լրագրող Յարոսլավ Կուլեմինը Twitter-ում նշել է, որ մեծ դժվարությամբ է օլիմպիական մարզադաշտ մուտք գործել, քանի որ  իր պայուսակում «Արսենալ»-ի կիսապաշտպան Հենրիխ Մխիթարյանի մարզաշապիկն է եղել:

«Փորձեցի մարզադաշտ գնալ՝ Մխիթարյանի մարզաշապիկը պայուսակիս մեջ: Մուտքի մոտ ինձ կանգնեցրին և ասացին, որ Ադրբեջանի կառավարության օրենքներով դա արգելված է. կա՛մ մարզաշապիկով՝ ընկերներիս մոտ, կա՛մ մարզադաշտ՝ առանց մարզաշապիկի»։

Բրիտանացի հայտնի ֆուտբոլային մեկնաբան, նախկին ֆուտբոլիստ Հարի Լինեքերն էլ իր միրկրոբլոգում գրառում է կատարել՝ դժգոհելով Բաքվի օլիմպիական  մարզադաշտի նստատեղերի՝ ֆուտբոլային դաշտից չափազանց հեռու լինելու առիթով, գրում է Euro-Football-ը:

«Այդքան ճանապարհ ես անցնում, որպեսզի Եվրոպայի լիգայի եզրափակիչին հետևես, բայց մարզադաշտում քո տեղում նստելիս  հասկանում ես, որ եթե տանից էլ հետևեիր, դաշտից նույնքան հեռավորության վրա էիր լինելու»,- նշել է Լինեքերը։

Իր հերթին, CNN-ի լրագրող Փիրս Մորգանն իր շոուի ընթացքում Բաքու մեկնած ֆուտբոլասերներին կոչ է արել աջակցել «Արսենալ»-ի կիսապաշտպան Հենրիխ Մխիթարյանին, որը, անվտանգության նկատառումներից ելնելով, Բաքու չէր մեկնել։

«Անհանավական է։ «Արսենալ»-ի յուրաքանչյուր երկրպագու այսօր երեկոյան պետք է Մխիթարյանի մարզաշապիկով լինի և նրա անունը վանկարկի։ Թույլ մի՛ տվեք այդ հակահայկական ռասիստներին հաղթել»,- Twitter-ում գրել է Փիրս Մորգանը։

Լրագրողն իր միկրոբլոգում նաև տեսանյութով է կիսվել, որում Բաքվի ոստիկանությունը կանգնեցնում է «Արսենալ»-ի կիսապաշտպան Հենրիխ Մխիթարյանի մարզաշապիկով օտարազգի երկրպագուներին։

Ավելի վաղ Փիրս Մորգանը լոնդոնյան երկու ֆուտբոլային ակումբներին կոչ էր արել բոյկոտել Եվրոպայի լիգայի եզրափակիչ հանդիպումը։

Հիշեցնենք, որ մայիսի 29-ին Ադրբեջանի մայրքաղաքում անցկացվող Եվրոպայի լիգայի եզրափակիչ՝ «Արսենալ»-«Չելսի» հանդիպումն ավարտվել է 1:4 հաշվով՝ հօգուտ «Չելսի»-ի:

Նելլի Մելքոնյան