16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Արթուր Պետրոսյանը հեռացել է «Լոռի»-ի գլխավոր մարզչի պաշտոնից
12.05.2019 | 18:48
Մայիսի 12-ին Արթուր Պետրոսյանը «Լոռի»-ի գլխավոր մարզչի պաշտոնից հեռանալու դիմում է ներկայացրել, որն ընդունվել է ակումբի ղեկավարության կողմից: Գլխավոր մարզչի պաշտոնակատար է նշանակվել Վահե Գևորգյանը, որն աշխատում էր Արթուր Պետրոսյանի մարզչական շտաբում: Այս մասին տեղեկացնում է ակումբի կայքը:
«Լոռի»-ի գլխավոր մարզչի պաշտոնում Արթուր Պետրոսյանը նշանակվել էր 2018 թվականի դեկտեմբերի 25-ին: Նրա գլխավորությամբ «Լոռին» հասել է Հայաստանի գավաթի եզրափակիչ:
«Լոռի» ֆուտբոլային ակումբը շնորհակալություն է հայտնում Արթուր Պետրոսյանին կատարած պրոֆեսիոնալ ու նվիրված աշխատանքի համար և հաջողություններ է մաղթում հետագա կարիերայում:
Պետրոսյանն ակումբի մամուլի ծառայության միջոցով իր խոսքն է ուղղել վանաձորյան ակումբի ղեկավարությանը, ֆուտբոլիստներին, ակումբի աշխատակազմին և երկրպագուներին.
«Առաջին հերթին ցանկանում եմ շնորհակալություն հայտնել «Լոռի» ֆուտբոլային ակումբի ղեկավարությանը և անձամբ ակումբի հիմնադիր Թովմաս Գրիգորյանին այստեղ աշխատելու հնարավորության համար:
Որպես մարզիչ անձամբ իմ առջև «Լոռի»-ի հետ եվրագավաթային ուղեգիր նվաճելու խնդիր էի դրել, որ ցավոք չի հաջողվում իրագործել: Ի սրտե ցանկանում եմ հաջողություն մաղթել այն մարզչին, որը ինձնից հետո կզբաղեցնի «Լոռի»-ի գլխավոր մարզչի պաշտոնը: Համոզված եմ, որ հաջորդ մրցաշրջանում «Լոռի»–ն կկարողանա լուծել իր առջև դրված խնդիրները: Շնորհակալություն եմ ցանկանում հայտնել ակումբի բոլոր աշխատակիցներին սրտացավ և հոգատար աշխատանքի համար: Առանձնահատուկ շնորհակալություն եմ ցանկանում հայտնել ակումբի երկրպագուներին, որոնք մշտապես թիմի կողքին էին և աջակցում էին, թե՛ լավ, թե՛ վատ պահերին: Հուսով եմ, որ ակումբը շատ շուտով կարդարացնի Ձեր բոլոր ակնկալիքները: Մաղթում եմ, որ մոտ ապագայում «Լոռի»-ն հասնի մեծ հաջողությունների և ուրախացնի ակումբի բոլոր երկրպագուներին»,- ասել է Պետրոսյանը:
