04.08.2026 | 16:00
Պատգամավորները Կոնջորյանին ընտրում են ԱԺ փոխնախագահ. ՈՒՂԻՂ
Պռոշյանում հայտնաբերված փոքրիկին որդեգրելու համար 7 անձ հերթագրվել է
Հասարակություն
29.08.2017 | 19:58
Օգոստոսի 12-ին Պռոշյան համայնքում ծառի տակ հայտնաբերված երեխային որդեգրելու ցանկություն է հայտնել 7 անձ: Այս մասին Factor.am-ի հետ զրույցում ասաց Պռոշյան համայնքի ղեկավար Արթուր Մուրադյանը:
«Մանկատուն կհանձնեն, էնտեղ արդեն հերթագրված են, 7 անձինք հաստատ գիտեմ՝ կան, մնացածից տեղյակ չեմ»,- մեզ հետ զրույցում տեղեկացրեց Պռոշյան համայնքի ղեկավարը:
Հարցին՝ ճանաչո՞ւմ է հերթագրվածներին, Արթուր Մուրադյանը նշեց, որ դա գաղտնիք է, չի կարող ասել:
Factor.am-ն ավելի վաղ գրել էր, որ երեխային, ում Պռոշյան համայնքի ղեկավարի և ավագանու որոշմամբ, կոչել էին Մարիամ Պռոշյան, որդեգրել ցանկացողներ կան: Սուրբ Աստվածամայր ԲԿ-ի վերակենդանացման և ինտենսիվ թերապիայի բաժանմունքի ղեկավար Աննա Չոբանյանն էլ մեզ հետ զրույցում հայտնեց, որ փոքրիկն առողջական լուրջ խնդիրներ չունի, սակայն որոշ հետազոտություններ է անցել, որոնց պատասխանները դեռևս հայտնի չեն:
«Եթե պատասխանները ստացվեն և առողջական վիճակի հետ կապված ամեն ինչ պարզ լինի, մեզ արդեն կասեն՝ ինչ անել»,- անդրադառնալով երեխայի՝ հիվանդանոցից դուրս գրման ժամկետներին՝ ասաց Աննա Չոբանյանը:
Հիշեցնենք՝ օգոստոսի 12-ին Պռոշյան համայնքի Տեղերաշեն փողոցի հողամասի ծառի տակ նորածին երեխա էր հայտնաբերվել, նրան տեղափոխել էին հիվանդանոց:
Շողիկ Գալստյան
