Խոստանում էին օպտիմալացնել քաղաքային դպրոցները, սակայն սկսեցին գյուղականներից

2017թ. մայիսի 11-ի նիստում վարչապետը հանձնարարական տվեց կրթական ոլորտի վերաբերյալ: ԿԳ նախարարությունը հայտարարեց, որ մինչև 200 աշակերտ ունեցող քաղաքային դպրոցները կմիավորվեն՝ շեշտելով, որ խոսքը գնում է քաղաքային դպրոցների մասին: Նշվեց նաև, որ հնարավորինս զերծ կմնան ուսուցչական անձնակազմի օպտիմալացումից:

«Խոսքը վերաբերում է ֆինանսավորման նոր մեխանիզմների ձևավորմանը և քաղաքային դպրոցների վերախմբավորմանը: Մենք ունենք խիստ թերբեռնված դպրոցներ և խիստ գերբեռնված դպրոցներ: Քաղաքային բնակավայրերում ունենք մի քանի դեպքեր, որոնք առաջին փուլում կանենք, որոնք ակնառու են և հստակ են, իսկ հետագայում կնայենք մեր դպրոցական համալիրի ամբողջական զարգացման սխեման, որի ընթացքում ինչ որ լինի, ծրագրով կներկայացնենք: Ինքը ժողովրդի հիշողություններով օպտիմիզացիայի հետ առանձնապես չի առնչվում: Բնականաբար, կլինեն նաև հաստիքների հստակեցումներ, բայց ցանկացած պարագայի՝ յուրաքանչյուր ծրագիր հաշվի է առնելու բոլոր կողմերի շահերը»,- մայիսի 18-ին լրագրողների հետ զրույցում ասաց ԿԳ նախարարը:

Օրեր անց, արձագանքելով քննադատություններին, Լևոն Մկրտչյանն ասաց, թե օպտիմալացման գործընթացի առնչությամբ թյուրըմբռնում կա. «Իրականում օպտիմալացումը պետք է իրականացվի ոչ թե գյուղական, այլ քաղաքային դպրոցներում»:

Այսօրվա նիստում, սակայն, կառավարությունն արեց բոլորովին այլ բան․ հենց առաջին փուլով օպտիմալացվեցին գյուղական դպրոցներ: Քաղաքային դպրոցների հետ միասին գործադիրը փակեց Արմավիրի մարզի Փարաքար գյուղի հիմնական դպրոցը, Կոտայքի մարզի Փյունիկ և Զովաշեն գյուղերի միակ դպրոցները: Միայն վերջին երկու դպրոցներից կրճատվեց 32 աշխատող՝ ամբողջ անձնակազմը: Կառավարության որոշմամբ «Փարաքարի հիմնական դպրոց» ՊՈԱԿ-ը կմիանա «Փարաքարի միջնակարգ դպրոց» ՊՈԱԿ-ին:

2016-2017 ուստարում Փարաքարի հիմնական դպրոցում սովորել է 190 աշակերտ, չնայած որ այն կառուցվել է 350 աշակերտի համար: «ՀՀ Կոտայքի մարզի Փյունիկի միջնակարգ դպրոց» ՊՈԱԿ-ը կմիանա «ՀՀ Կոտայքի մարզի Արտավազի միջնակարգ դպրոց» ՊՈԱԿ-ին: Փյունիկի դպրոցում 39 աշակերտ կա, 20 աշխատող: Վերջիններս աշխատանքից կազատվեն, իսկ աշակերտները գյուղից գյուղ կտեղափոխվեն Հրազդան-Հանքավան ներմարզային երթուղին սպասարկող 2 կազմակերպությունների միկրոավտոբուսներով՝ միավորման արդյունքում տնտեսված միջոցների հաշվին: «ՀՀ Կոտայքի մարզի Զովաշենի հիմնական դպրոց» ՊՈԱԿ-ը կմիանա «ՀՀ Կոտայքի մարզի Հատիսի Վարդան Վարդանյանի անվան միջնակարգ դպրոց» ՊՈԱԿ-ին: Զովաշենի հիմնական հիմնական դպրոցում սովորում է 9 աշակերտ: Ուսուցիչների, վարչական և սպասարկման անձնակազմի թիվը 12 է:

Սևակ Հակոբյան