Էդ ի՞նչ սպառնալիք ենք ստեղծում ՀՀ-ում օրինականության և թափանցիկության համար․ Փաշինյանը՝ սուպերվարչապետական համակարգից ազատվելու մասին․ ՏԵՍԱՆՅՈՒԹ

Ազգային անվտանգության ծառայության և Ոստիկանության կարգավիճակի մասին կարող եմ ասել, որ միանշանակ է մեկ բան՝ պետական մարմինները պետք է լինեն խորհրդարանական վերահսկողության ներքո, բայց դա չի նշանակում, որ դրա ճանապարհը նախարարություն դարձնելն է․ ի՞նչ է Ոստիկանության պարագայում նախարարությունը. դրանից բխում է, որ  քաղաքական դեմք պետք է նշանակվի այդ կառույցի ղեկավար, այսինքն՝ տվյալ ուժային կառույցը քաղաքականացվում է։ Այս մասին այսօր նախագահական նստավայրում կառավարության անդամների երդմնակալության արարողությունից հետո լրագրողների հետ ճեպազրույցում ասաց ՀՀ վարչապետ Նիկոլ Փաշինյանը։

«Այսօվա կարգավորման արդյունքում իրավապահ համակարգի կայունությունը պահպանվել է․ այնտեղ կադրային փոփոխությունները լինում են բալանսավորված, որպեսզի այդ կայունությունը չխաթարվի, իսկ նախարարի դեպքում կարելի է ցանկացած մեկին նշանակել այդ ուժային կառույցի ղեկավար։ Այն, որ կառավարությանն առընթեր մարմինները պետք է լինեն խորհրդարանական վերահսկողության ներքո, դրա հետ ես համաձայն եմ, և մենք հավատարիմ ենք այս գաղափարին»,- ասաց վարչապետը։

Կառավարության ղեկավարի խոսքով՝ սխալ է այն տպավորությունը, որ ԱԱԾ տնօրենն ու Ոստիկանության պետը ավելի քիչ են ենթարկվում վարչապետին, քան նախարարները։

«Սուպերվարչապետի թեմայով ես ասել եմ, որ այդ համակարգից բալանսավորման պետք է գնանք, բայց դա չի նշանակում, որ մենք մի օրում կարող ենք դա անել։ Այո՛, կարելի է մեկ օրում դա անել, բայց կարող է պարզվել, որ երկրում անիշխանություն է ստեղծվել։ Էդ ի՞նչ սպառնալիք ենք մենք ստեղծում այսօր Հայաստանում օրինականության, ժողովրդավարության, թափանցիկության համար, այսօր ՀՀ-ի պետական կառավարման համակարգը թափանցիկ է առավել քան երբևէ»,- ասաց Փաշինյանը։

Կառավարության ղեկավարը որպես այդ թափանցիկության դրսևորում հիշեցրեց ԱԺ «Իմ քայլը» խմբակցությունում ՊԵԿ նախագահ Դավիթ Անանյանի հետ քննարկումն այդ կառույցում տրված պարգևավճարների հարցով։

Մանրամասները՝ տեսանյութում։

Աղավնի Սուքիասյան