Պատրաստ ենք քննարկել. Արամ Սարգսյանը՝ Արտակ Զեյնալյանի հետագա պաշտոնավարման մասին

Խորհրդարանական արտահերթ ընտրություններն այլևս իրողություն են: Առաջիկայում սպասվում է 7-րդ գումարման Ազգային ժողովի և կառավարության ձևավորումը:

Ազգային ժողովը, սակայն, ձևավորումից հետո վարչապետ չի ընտրի: Սահմանադրության համաձայն՝ հանրապետության նախագահը նորընտիր Ազգային ժողովի լիազորությունների ժամկետը սկսվելուց հետո անհապաղ վարչապետ կնշանակի խորհրդարանական մեծամասնության ներկայացրած թեկնածուին: Վարչապետը նշանակվելուց հետո 15-օրյա ժամկետում կձևավորի նոր կառավարությունը, որն էլ առավելագույնը 20 օրվա ընթացքում խորհրդարանին կներկայացնի իր գործունեության ծրագիրը։

Նշենք, որ Կառավարության կազմից ՔՊ-ական մի շարք նախարարներ ընդգրկված էին ընտրական ցուցակներում և մասնակցում էին քարոզարշավին: Թե նրանցից ովքեր կշարունակեն գործադիրում աշխատանքը, դեռևս պարզ չէ:

Factor.am-ի տեղեկություններով՝ հեղափոխությունից հետո արդարադատության նախարարի պաշտոնը զբաղեցրած «Հանրապետություն» կուսակցության անդամ Արտակ Զեյնալյանը չի վերանշանակվի: Արտակ Զեյնալյանը, հիշեցնենք, Երևանի ավագանու ընտրություններին «Լույս» դաշինքի քաղաքապետի թեկնածուն էր:

«Հանրապետություն» կուսակցության առաջնորդից հետաքրքրվեցինք՝ Արտակ Զեյնալյանը կշարունակի՞ աշխատել Նիկոլ Փաշինյանի կառավարությունում. «Եթե առաջարկեն, հաստատ կքննարկենք ու որոշում կունենանք»:

Ավելի վաղ, Factor.am-ը գրել էր, թե ովքեր կզբաղեցնեն ԱԺ նախագահի և երկու փոխնախագահների պաշտոնները:

Շողիկ Գալստյան