Քաղաքականություն
04.11.2026 | 10:48
Նոյեմբերի 3-ին եվրոպական քաղաքների միջև չվերթներ իրականացնող առնվազն յոթ ինքնաթիռ ռումբի առկայության մասին կեղծ ահազանգեր է ստացել։ Դրանցից չորսը պատկանել են Ryanair բյուջետային ավիաընկերությանը. գրում է DW-ի ռուսական ծառայությունը` Reuters-ին հղում անելով։
Ահազանգերի պատճառով որոշ օդանավեր ուղղորդվել են այլ օդանավակայաններ, իրականացվել են անվտանգության ստուգումներ։
Երկու ինքնաթիռ ուղևորվում էր Վարշավա, ևս երկուսը՝ Սոֆիա և Հռոմ, իսկ մեկը՝ իսպանական Մուրսիա քաղաք։ Լոնդոնից Լեհաստանի մայրաքաղաք թռչող LOT ավիաընկերության ինքնաթիռը Շոպենի անվան գլխավոր օդանավակայանի փոխարեն ուղղորդվել է մոտակայքում գտնվող Վարշավա-Մոդլին օդանավակայան։ Ինքնաթիռի զննության ընթացքում օդանավակայանը ժամանակավորապես փակվել է։ Կոպենհագենից թռչող Scandinavian Airlines-ի ինքնաթիռը վայրէջք է կատարել Շոպենի օդանավակայանում, սակայն օդանավում վտանգավոր առարկաներ չեն հայտնաբերվել։
Պայթուցիկ սարքերի մասին ահազանգեր են ստացել նաև իռլանդական Ryanair և հունգարական Wizz Air բյուջետային ավիաընկերությունների ինքնաթիռները, որոնք Սոֆիա էին ուղևորվում համապատասխանաբար Դուբլինից և Միլան-Բերգամո օդանավակայանից։ Սպառնալիքների պատճառով ստուգվել են Ryanair-ի ևս երեք օդանավեր։ Դրանցից մեկը վայրէջք է կատարել Մուրսիայում, իսկ երկուսը՝ Հռոմում՝ ժամանելով Լիսաբոնից և Դուբլինից։
Reuters-ը հիշեցնում է նաև նոյեմբերի 2-ին տեղի ունեցած միջադեպը։ Այդ օրը Լոնդոնից Սոֆիա թռչող Wizz Air-ի օդանավը ռումբի մասին ահազանգից հետո հունգարական կործանիչի ուղեկցությամբ արտակարգ վայրէջք էր կատարել Բուդապեշտի օդանավակայանում։ Այդ ինքնաթիռում նույնպես պայթուցիկ նյութերի հետքեր չեն հայտնաբերվել։
«Հստակ թիրախի՝ կոնկրետ պետության, ավիաընկերության կամ երթուղու բացակայությունը վկայում է, որ նպատակը ավիահաղորդակցության ընդհանուր խաթարումն էր»,- Reuters-ին ասել է ավիացիոն ոլորտի ռիսկերի վերլուծությամբ մասնագիտացված Osprey Flight Solutions խորհրդատվական ընկերության վերլուծական բաժնի ղեկավար Ռիս Ջոնսը։ Առայժմ հայտնի չէ, թե ով է կանգնած կեղծ ահազանգերի հետևում։
Թարգմանությունը՝ Էմմա Չոբանյանի
