Կամ հանք պետք է ունենալ, կամ ապրել աղքատության մեջ, առաջին դիսկուրսը սա է․ էկոակտիվիստ․ ՏԵՍԱՆՅՈՒԹ

Հայաստանյան հանրային խոսույթում արհեստականորեն արմատավորվում է այն թեզը, թե երկիրը կանգնած է ծայրահեղ ընտրության առաջ․ կամ պետք է շահագործել հանքեր ու ունենալ տնտեսական բարեկեցություն, կամ հրաժարվել դրանցից և ապրել աղքատության մեջ: Այս մասին «Հանրային ձայնի երաշխիք» խորագրով քննարկման ժամանակ հայտարարեց ռազմավարական հաղորդակցության փորձագետ, «Կանաչ խորհուրդների դաշնության» անդամ Հայկ Աբրահամյանը:

Նրա դիտարկմամբ՝ վերջին տարիներին բնապահպանական ակտիվիզմի դեմ պայքարը չի սահմանափակվում միայն իրավական ճնշումներով կամ դատական հայցերով. ակտիվորեն կիրառվում են հանրային կարծիքը շահարկող և ակտիվիստների հեղինակությունը թիրախավորող նարատիվներ:

«Ամենատարածված դիսկուրսը բնապահպանությունը տնտեսական զարգացմանը հակադրելն է: Հարցը մշտապես դրվում է․ կամ բնությունն է, կամ աղքատությունը: Ձևավորվում է երկընտրանք, թե, իբր, մենք միայն կարող ենք ընտրել երկու տարբերակից մեկը․ կամ ունենալ հանք ու աշխատանք, կամ ապրել աղքատության մեջ՝ զուտ բնությունը պահպանելու համար։ Սա արհեստական հակադրություն է, որը դուրս է թողնում համայնքների կայուն զարգացման այլընտրանքները և ակտիվիստին ներկայացնում որպես «զարգացման դեմ պայքարողի»»,- նշեց Աբրահամյանը:

Որպես երկրորդ վտանգավոր միտում՝ բանախոսն առանձնացրեց ակտիվիստներին որպես «անվտանգային սպառնալիք» ներկայացնելու քաղաքականությունը: Ըստ նրա՝ շրջանառվում են թեզեր, թե բնապահպանները խոչընդոտում են բյուջեի մուտքերը, որով ֆինանսավորվում է բանակը, կամ էլ աղտոտվածության մասին փաստեր հրապարակելով՝ «կեղտոտ լվացքը դուրս են հանում» և վնասում երկրի միջազգային վարկանիշը:

Մանրամասները՝ տեսանյութում։

Անի Թամրազյան