Ալբերտա նահանգի բնակիչները քվեարկել են Կանադայի կազմում մնալու օգտին՝ մերժելով անկախության հանրաքվեի ծրագիրը

Կանադայի Ալբերտա նահանգը մերժել է անկախության վերաբերյալ պարտադիր հանրաքվե անցկացնելու ծրագիրը։ Երեքշաբթի հրապարակված արդյունքները ցույց են տվել, որ հաղթել է միասնական Կանադայի գաղափարը՝ երկրի և ԱՄՆ-ի հարաբերությունների վատթարացման ֆոնին, գրում է AFP-ն։

Կանադայի հանրային հեռարձակող CBC-ն և առաջատար մասնավոր CTV-ն կանխատեսել են դաշնայնացման կողմնակիցների հստակ հաղթանակը։ Պաշտոնական արդյունքների համաձայն՝ քվեաթերթիկների գրեթե 45 տոկոսի հաշվարկից հետո ընտրողների ավելի քան 76 տոկոսը կողմ է արտահայտվել Ալբերտայի՝ Կանադայի կազմում մնալուն։

Կանադայի վարչապետ Մարկ Քարնին ողջունել է արդյունքը՝ նշելով, որ Ալբերտայի բնակիչները միասնության օգտին «հստակ ընտրություն» են կատարել։

«Նրանք ընտրել են միասնությունը՝ միասին կառուցելու և միմյանց մասին հոգ տանելու համար»,- գրել է նա X-ում։

Ալբերտայում մեծացած Քարնին կոչ էր արել նահանգին մերժել անջատողականությունը՝ պնդելով, որ Կանադային կայունություն է անհրաժեշտ՝ ԱՄՆ նախագահ Դոնալդ Թրամփի առևտրային պատերազմի և Կանադան բռնակցելու սպառնալիքների պայմաններում։

Նահանգի մայրաքաղաք Էդմոնթոնի ռեստորաններից մեկում, որտեղ անջատողական առաջատար խմբերից մեկը հետևում էր քվեարկության արդյունքներին, մռայլ մթնոլորտ է տիրել։ Անջատողական «Ալբերտայի բարգավաճման նախագիծ» շարժման առաջատար ներկայացուցիցչներից Ջեֆրի Ռաթը լրագրողներին ասել է, որ անկախության հասնելու իրենց պայքարը, «անկասկած», շարունակվելու է՝ չնայած երկուշաբթի կայացած քվեարկության արդյունքներին։

«Ինձ համար մենք արդեն հաղթել ենք։ Մենք այս նահանգում հսկայական շարժում ենք ստեղծել։ Մենք Ալբերտայի բնակիչներին տեղեկացրել ենք անկախության առավելությունների մասին և շարունակելու ենք առաջ շարժվել»,- ասել է Ռաթը։

Ալբերտայի վարչապետ Դանիել Սմիթը՝ պահպանողական քաղաքական գործիչ, որը դեմ էր անկախությանը, ողջունել է «Կանադայի կազմում մնալու օգտին լայն աջակցությունը»։ Սմիթը, որը նախաձեռնել էր հանրաքվեն, հայտարարել է, որ դաշնայնացման կողմնակիցների հաղթանակը վերջ կդնի անջատման հարցի շուրջ վեճին, որը պառակտել է նահանգը։

Արտաքին միջամտություն

Ալբերտան ունի աշխարհում նավթի ապացուցված պաշարների չորրորդ խոշորագույն ծավալը, և անջատողական տրամադրությունների զգալի մասը պայմանավորված է նավթարդյունաբերության կառավարման վերաբերյալ դժգոհությամբ։ Սմիթն անջատողական տրամադրությունների աճի համար մեղադրել է Քարնիի նախորդին՝ Ջասթին Թրյուդոյին՝ պնդելով, որ վերջինը փորձել է սահմանափակել նավթի արդյունահանումը՝ կլիմայի պաշտպանությանն ուղղված իր օրակարգն առաջ մղելու նպատակով։

Ալբերտայի անկախության ձգտումը շարունակական հետաքրքրություն է առաջացրել նաև ԱՄՆ նախագահ Դոնալդ Թրամփի դաշնակիցների շրջանում։

ԱՄՆ ֆինանսների նախարար Սքոթ Բեսենթն Ալբերտան անվանել է Միացյալ Նահանգների «բնական գործընկեր»։ Թրամփի գլխավոր աջակիցներից Իլոն Մասկն այս ամիս X-ում գրել է, որ Ալբերտան «պետք է անջատվի Կանադայից»։

«Ալբերտայի բարգավաճման նախագիծ» շարժման ղեկավար Ռաթը հանդիպումներ է ունեցել նաև ԱՄՆ Պետքարտրուղարությունում, իսկ անջատողականները խորհրդատվություն են ստացել Հանրապետական կուսակցության քաղաքական գործիչներից։