Բենզալցակայանի քանդման պատճառը Մեսրոպ Մանուկյանը չէ, այն ինքնակամ է. Աջափնյակի թաղապետ. ՏԵՍԱՆՅՈՒԹ

Երևանի Աջափնյակ վարչական շրջանի Շինարարների փողոցում իրականացվող ապամոնտաժման աշխատանքների շրջանակում քանդվում է ինքնակամ կառուցված բենզալցակայանը։ Վարչական շրջանի ղեկավար Սերոբ Սարգսյանը Factor TV-ի հետ զրույցում անդրադարձել է քանդման պատճառներին, անվտանգության նորմերին և ընդդիմադիր պատգամավոր Մեսրոպ Մանուկյանի արձագանքին։

Սարգսյանի փոխանցմամբ՝ քաղաքային իշխանությունները հանձնարարական ունեն հանրային տարածքները վերադարձնելու քաղաքացիներին։ Շինարարների փողոցում առկա շուրջ 60 ինքնակամ շինություններից արդեն ապամոնտաժվել են գրեթե բոլորը։

«Այս բենզալցակայանի կառուցման առաջին թույլտվությունը տրվել է 1997 թվականին, իսկ 2000-ականներին կառույցն ընդլայնվել է։ Մենք ունենք քաղաքապետի քանդման համապատասխան որոշումը։ Քանի որ սա բենզալցակայան է, հրավիրել ենք Փրկարար ծառայության աշխատակիցներին՝ անվտանգությունն ապահովելու համար։ Վառելիքը դուրս է բերվել, իսկ տարաներում ջուր է լցվել, որպեսզի որևէ ռիսկ չառաջանա»,- պարզաբանեց թաղապետը։

Անդրադառնալով ԱԺ «Հայաստան» խմբակցության պատգամավոր Մեսրոպ Մանուկյանի՝ ապամոնտաժման վայրում հայտնվելուն՝ Սերոբ Սարգսյանը հերքեց, թե լցակայանի քանդումը պայմանավորված է եղել պատգամավորի գործոնով։

«Մենք հերթով քանդելով գալիս էինք, հասնում էինք այստեղ։ Մեսրոպ Մանուկյանի աղմուկը կապված էր աներոջ բենզալցակայանի հետ։ Ինքը տեղին էր անհանգստանում, մենք մեկ է՝ հասնելու էինք այդ բենզալցակայանին, և սա ևս մեկ անգամ փաստեց, որ ընդդիմությունը աղմուկում է այն ժամանակ, երբ հասնում ենք իրենց ապօրինի ունեցվածքին»,- հայտարարեց Սարգսյանը։

Թաղապետը հայտնեց նաև, որ տարածքում առկա երկու շինություն չի ապամոնտաժվել, քանի որ սեփականատերերը դատարանից արգելանքի որոշումներ են բերել։ Նա վստահեցրեց, որ դատական արգելանքը վերանալուց հետո դրանք նույնպես կապամոնտաժվեն։

Բացի այդ, Սարգսյանը մատնանշեց, որ բենզալցակայանը գտնվում է բնակելի շենքից ընդամենը 12-13 մետր հեռավորության վրա՝ նախատեսված 25 մետրի փոխարեն, ինչը տարիներ շարունակ անհանգստություն է պատճառել բնակիչներին։

Մանրամասները՝ տեսանյութում։

Եվգենյա Համբարձումյան