Թուրքիան նախարարի մակարդակով COP17-ին մասնակցելու է, Ադրբեջանի վերաբերյալ տեղեկատվություն չունեմ․ վարչապետ․ ՏԵՍԱՆՅՈՒԹ

Թուրքիան նախարարական մակարդակով մասնակցելու է Երևանում անցկացվող COP17 համաժողովին, իսկ Ադրբեջանի մասնակցության վերաբերյալ այս պահին հաստատված տեղեկատվություն չկա: Այս մասին լրագրողների հետ ճեպազրույցի ժամանակ հայտարարեց ՀՀ վարչապետ Նիկոլ Փաշինյանը:

Անդրադառնալով ընդդիմության քննադատություններին՝ կապված COP17-ի անցկացման ծախսերի և կոռուպցիոն ռիսկերի հետ, վարչապետը նշեց, որ ցանկացած ֆինանսական ծախս պարունակում է կոռուպցիոն ռիսկ, և Կառավարության խնդիրն է դրանք արդյունավետ կառավարել:

Նրա փոխանցմամբ՝ Կառավարությունը նախապես հաշվի է առել բոլոր ռիսկերը և ստեղծել է հատուկ ընթացակարգեր՝ ՄԱԿ-ի ստանդարտների շրջանակներում:

Նիկոլ Փաշինյանն ընդգծեց, որ COP17 համաժողովը ներդրում է Հայաստանի տնտեսական զարգացման գործում։ Ըստ նրա՝ միայն հոկտեմբերին COP17-ի շրջանակներում Հայաստան է այցելելու ավելի քան 15 000-20 000 մարդ, ինչը կբարձրացնի երկրի ճանաչելիությունը և հետագայում կավելացնի զբոսաշրջային հոսքերը:

Բացի այդ, «Մերիդիան» կենտրոնում իրականացված ներդրումների շնորհիվ ձևավորվել է միջազգային չափանիշներին համապատասխանող ֆիզիկական ենթակառուցվածք: Կառավարությանն է փոխանցվելու տարածքների հազարավոր ժամերի վարձակալության իրավունք, որոնք Պետական ակտիվների կառավարման կոմիտեն կկարողանա վաճառել՝ լրացուցիչ եկամուտներ բերելով պետական բյուջե:

Վարչապետը եզրափակեց, որ ծախսված «ամեն լուման» ուղղակի կամ անուղղակի ճանապարհով վերադառնալու է պետական բյուջե և քաղաքացիների գրպանը։

«5 տարի առաջ Հայաստանի Հանրապետությունը, սկսած ֆինանսականից, նման հնարավորություն չուներ և չէր կարող ունենալ․ հիմա ունի, և այդ հնարավորությունը պետք է օգտագործել Հայաստանի հետագա զարգացման գործում ներդրում ունենալու համար»,-ասաց նա:

Մանրամասները՝ տեսանյութում։

Եվգենյա Համբարձումյան