Աշխատանքային շահերի բախում պետք է առաջանա. Կարեն Կարապետյան

ՀՀ Կառավարության այսօրվա նիստում վարչապետ Կարեն Կարապետյանի հանձնարարականներից մեկն էլ վերաբերում էր անտառային ոլորտի համալիր բարեփոխումներին: Կառավարության ղեկավարը հիշեցրեց, որ բազմիցս անդրադարձել է այդ հարցին, առկա խնդիրներին և համալիր բարեփոխումների անհրաժեշտությանը:

«Անտառային ոլորտի բարեփոխումների մշակված հայեցակարգը բավարար լուծումներ չի նախատեսում անտառների պահպանության, ապօրինի ծառահատումների դեմ պայքարի, ինչպես նաև առկա պատասխանատու կառույցների կառավարման և գործունեության արդյունավետության բարձրացման խնդիրների համար: Ավելին՝ փաստաթղթում բացակայում են անհրաժեշտ օրենսդրական փոփոխություններին ուղղված առաջարկություններ»,- մանրամասնեց Կարապետյանը:

Վերոնշյալը հաշվի առնելով՝ գործադիրի ղեկավարը ՀՀ գյուղատնտեսության, բնապահպանության, տարածքային կառավարման և զարգացման նախարարներին հանձնարարեց` մեկամսյա ժամկետում համատեղ մշակել և կառավարության աշխատակազմ ներկայացնել անտառային ոլորտի բարեփոխումների հայեցակարգի լրամշակված նախագիծ՝ ամրագրելով վերոնշյալ խնդիրներին ուղղված հստակ գործնական և օրենսդրական լուծումներ՝ անդրադառնալով նաև անտառկառավարման և պահպանության գործառույթների հստակ տարանջատմանը, ինչպես նաև ոլորտի միասնական կազմակերպչական դաշտի ստեղծման հարցերին:

Կարապետյանը նշեց, որ դրանց կատարման համար նախատեսել է սեղմ ժամկետներ: «Մենք ունենք անտառի տնտեսությամբ զբաղվող մի քանի կառույց, որտեղ գործառույթները հստակ տարանջատված չեն: Տրամաբանությունն այս հանձնարարականի հետևյալն է՝ մենք ուզում ենք կառավարի մի կառույց, վերահսկի մեկ այլ կառույց, որպեսզի առաջանա համապատասխան աշխատանքային շահերի բախում, որտեղ արյդունավետությանը նպաստող պայմաններ կստեղծվեն»,- եզրափակեց Կարապետյանը:

Շողիկ Գալստյան