30.09.2026 | 21:27
«Դարի կողոպուտը». Էրդողանի բարձրաստիճան կուսակցի ակտիվները սառեցվում են ներդրումային ֆոնդի շուրջ սկանդալի ֆոնին
Թուրքիան և Ադրբեջանը պաշտպանական արդյունաբերության ոլորտում 500 մլն դոլարի պայմանագրեր են ստորագրել
Քաղաքականություն
30.09.2026 | 20:12
Թուրքիայի և Ադրբեջանի միջև ստորագրվել են պաշտպանական արդյունաբերության արտադրանքի մատակարարման վերաբերյալ մի շարք պայմանագրեր, ինչպես նաև փոխըմբռնման հուշագիր։ Ադրբեջանական լրատվամիջոցների հաղորդմամբ՝ այս մասին սոցիալական ցանցում գրել է Թուրքիայի պաշտպանական արդյունաբերության նախարար Հալուք Գյորգյունը։
Նրա խոսքով՝ երկու երկրների պաշտպանական կարողությունները ամրապնդող պայմանագրերը ներառում են՝
- TUSAŞ-ի հետ պայմանագիր՝ HÜRKUŞ ինքնաթիռների մատակարարման վերաբերյալ,
- ASELSAN-ի հետ փոխըմբռնման հուշագիր՝ ALP-100 ռադարի մատակարարման վերաբերյալ,
- BAYKAR-ի հետ պայմանագիր՝ «Mızrak» խելացի թափանցող զինամթերքի մատակարարման վերաբերյալ,
- BAYKAR-ի հետ պայմանագիր՝ «Antidot» համակարգի մատակարարման վերաբերյալ,
- ROKETSAN-ի հետ պայմանագիր՝ «Barbaros» առափնյա պաշտպանության համակարգի մատակարարման վերաբերյալ։
Հալուք Գյորգյունը նշել է, որ պայմանագրերի ընդհանուր արժեքը գերազանցում է 500 միլիոն դոլարը։
«Մաղթում եմ, որ այս պայմանագրերը օգուտ բերեն երկու եղբայրական երկրներին»,- հավելել է նա։
Հաղորդվում է, որ 14 HÜRKUŞ-II ինքնաթիռներ կփոխանցվեն Ադրբեջանին։ Ընդհանուր առմամբ, Թուրքիան նախատեսում է իր սեփական ռազմաօդային ուժերի համար արտադրել 55 HÜRKUŞ-II ինքնաթիռ։ Սեպտեմբերի 28-ին առաջին երկու ինքնաթիռները պաշտոնապես փոխանցվել են Թուրքիայի ռազմաօդային ուժերին, իսկ մինչև 2026 թվականի վերջը սպասվում է ևս 12 ինքնաթիռի մատակարարում։
HÜRKUŞ-II-ը TUSAŞ ընկերության կողմից մշակվել է որպես նոր սերնդի ինքնաթիռ՝ ռազմական օդաչուների բազային պատրաստության համար։
Նշենք, որ Բաքվում սեպտեմբերի 30-ից հոկտեմբերի 2-ն անցկացվում է ADEX պաշտպանական միջազգային VI ցուցահանդեսը։
Թարգմանությունը՝ Էմմա Չոբանյանի
