Քաղաքականություն
02.09.2026 | 15:45
Ուկրաինայի անվտանգության ծառայությունը (ՈւԱԾ) հայտարարել է, որ Պաշտպանության նախարարության Գլխավոր հետախուզական վարչության հետ համատեղ կանխել է ռուս ընդդիմադիրներից մեկի դեմ մահափորձը․ գրում է Meduza-ն։
«ՌԲԿ-Ուկրաինա»-ն, հղում անելով ՈւԱԾ հաղորդագրությանը, գրում է, որ ՌԴ Անվտանգության դաշնային ծառայությունը (ԱԴԾ) ծրագրել էր մահափորձն իրականացնել ընդդիմադիրի՝ Կիև կատարելիք այցի ժամանակ՝ Ուկրաինայի Անկախության օրը՝ օգոստոսի 24-ին։
ՈւԱԾ-ն չի հրապարակել այն ընդդիմադիրի անունը, որի դեմ, ըստ ծառայության, նախապատրաստվում էր մահափորձը, այլ մանրամասներ նույնպես չի հայտնել։
Ուկրաինական լրատվամիջոցների տվյալներով՝ խոսքը «Ռուսական կամավորական կորպուսի» (ՌԿԿ) հրամանատարի տեղակալ Ստեպան Կապլունովի մասին է։ Սեպտեմբերի 1-ին ՌԿԿ-ն հայտնել էր, որ Կապլունովը մի քանի օր առաջ անհետացել է իր տան մոտից, և նրա գտնվելու վայրը հայտնի չէ։
2025 թվականի դեկտեմբերին ՌԿԿ-ն հայտարարել էր իր հրամանատար Դենիս Կապուստինի մահվան մասին։ Սակայն ավելի ուշ պարզվել էր, որ Կապուստինը ողջ է, իսկ նրա մահվան մասին տեղեկությունը տարածվել էր ուկրաինական հատուկ ծառայությունների իրականացրած գործողության շրջանակում։
Թարգմանությունը ՝ Էմմա Չոբանյանի
