17.08.2026 | 16:36
Երևանում երեկոյան ժամերին սպասվում է քամու ուժգնացում
Արտահանողները նավթի գաղտնի փոխադրումներ են իրականացնում Հորմուզի նեղուցով. Bloomberg
Քաղաքականություն
17.08.2026 | 13:26
Մերձավոր Արևելքի երկրներից նավթ արտահանողները գաղտնի փոխադրումներ են իրականացնում Հորմուզի նեղուցով, գրում է Bloomberg-ը։ Այս փոխադրումները, այլ միջոցառումների հետ մեկտեղ, նպաստում են նավթի համաշխարհային գների պահպանմանը մեկ բարելի համար 80-90 դոլարի սահմաններում, փոխանցում է Meduza-ն։
Նավթը Հորմուզի նեղուցով տեղափոխվում է անջատված տրանսպոնդերներով նավերով, այնուհետև Օմանի ծոցում տեղափոխվում լցանավեր՝ հետագա փոխադրման համար:
Bloomberg-ը նշում է, որ այս գաղտնի փոխադրումների ծավալների մասին վկայում են Sentinel 1 արբանյակից ստացված պատկերները: Օգոստոսի 11-ին արված պատկերները ցույց են տալիս տարբեր չափերի շուրջ 150 նավ Օմանի ափերի մոտ: Հունվարին այդ տարածքում գտնվել է ընդամենը մոտ 40 նավ:
Հստակ հայտնի չէ, թե որքան նավթ է այս եղանակով տեղափոխվում Հորմուզի նեղուցով: Պարբերականի աղբյուրները նշել են միայն, որ օրական «ավելի քան չորս միլիոն բարել նավթ» է տեղափոխվում՝ առանց մանրամասներ տրամադրելու:
ԱՄՆ էներգետիկայի նախարար Քրիս Ռայթն ավելի վաղ հայտարարել էր, որ օգոստոսի սկզբին, չնայած շրջափակմանը, օրական շուրջ 9 միլիոն բարել նավթ է անցել Հորմուզի նեղուցով։ Սա մինչև Իրանի դեմ ԱՄՆ-Իսրայել պատերազմը Հորմուզի նեղուցով փոխադրվող ծավալի մոտավորապես կեսն է։
Մինչև պատերազմը համաշխարհային նավթի տարանցման մինչև 20%-ն անցնում էր Հորմուզի նեղուցով։ Պատերազմի մեկնարկից հետո Իրանը փակել է նեղուցը նավերի անցման համար, ինչը հանգեցրել է նավթի համաշխարհային գների կտրուկ աճի։ ԱՄՆ-ը, իր հերթին, ռազմածովային շրջափակում է մտցրել՝ թույլ չտալով նավերի մուտքը իրանական նավահանգիստներ։ Իրանը հարձակվում է առանց իր թույլտվության նեղուցով անցնել փորձող նավերի վրա։ Այս հարձակումներին ի պատասխան՝ ԱՄՆ-ը հարվածներ է հասցնում Իրանի ռազմական ենթակառուցվածքներին։
