Ինչ է բռնագանձվելու Սերժ Սարգսյանց և նրան փոխկապակցված անձանցից. Վարդապետյանը ներկայացրեց վճիռները․ ՏԵՍԱՆՅՈՒԹ

Գլխավոր դատախազ Աննա Վարդապետյանը կառավարության հերթական նիստում հայտարարեց, որ միայն ապօրինի ծագում ունեցող գույքի բռնագանձման մասով այս պահին դատարաններում կա 172 հայց՝ շուրջ 628 միլիարդ 600 միլիոն դրամ ընդհանուր հայցագնով։ 

Վարդապետյանը հայտնեց, որ արդեն օրինական ուժի մեջ մտած դատական ակտերով վերադարձված գույքի արժեքը միայն ապօրինի ծագում ունեցող գույքի բռնագանձման շրջանակում կազմում է 6 միլիարդ 300 միլիոն դրամ։ 

Ըստ այդմ՝ Արագածոտնի նախկին մարզպետ Սարգիս Սահակյանի և փոխկապակցված անձանց վերաբերյալ գործով, ըստ դատախազի, օրինական ուժի մեջ մտնելուց հետո հօգուտ պետության ենթակա է բռնագանձման Արաբկիրում գտնվող 1 բնակարանի 45 տոկոսը, Աշտարակում գտնվող 1 բնակելի տունն ամբողջությամբ և 184 միլիոն 222 հազար 585 դրամ։

Սերժ Սարգսյանի և նրան փոխկապակցված անձանց վերաբերյալ գործով ենթակա են բռնագանձման Երևանում գտնվող երեք անշարժ գույք, բանկային ավանդներ՝ 202 միլիոն 998 հազար դրամի չափով, դրանց տոկոսագումարները և 352 միլիոն 438 հազար դրամ։

Հրազդանի նախկին քաղաքապետ Արամ Դանիելյանի և նրան փոխկապակցված անձանց վերաբերյալ գործով նախատեսվում է բռնագանձել ութ անշարժ գույք, մեկ իրավաբանական անձում 50 տոկոս մասնակցություն, 2 տրանսպորտային միջոց, 2 անշարժ գույք և 1 տրանսպորտային միջոցի բռնագանձման անհնարինությամբ պայմանավորված դրանց արժեքը, ինչպես նաև  85 միլիոն 430 հազար դրամ։

Սերժ Սարգսյանի եղբոր աղջկա՝ Անի Լյովայի Սարգսյանի վերաբերյալ գործով դատարանի վճռով ենթակա է բռնագանձման էլեկտրաէներգիայի արտադրությամբ զբաղվող ընկերության 39 հազար 341 բաժնետոմս, 864 հազար դոլարի ավանդ, ինչպես նաև դրամական միջոցներ։

Դատախազը հայտնել է նաև Մանվել Գրիգորյանի ժառանգների և նրան փոխկապակցված անձանց վերաբերյալ գործի մասին, որով նախատեսվում է բռնագանձել 9 անշարժ և 6 շարժական գույք, 1 իրավաբանական անձում մասնակցություն և 340 միլիոն դրամ։

Մանրամասները՝ տեսանյութում։

Արփի Հակոբյան