Մի հատ սո՛ւս մնա, էս պառլամենտը լեգիտիմ չէ. Հայաստանի քաղաքացու քվեով ձևավորվածը չէ. Մանուկյան․ ՏԵՍԱՆՅՈւԹ

Ազգային ժողովի իններորդ գումարման անդրանիկ նիստի ժամանակ «Հայաստան» խմբակցության պատգամավոր Գեղամ Մանուկյանը հայտարարել է, որ ներկայիս խորհրդարանը զուրկ է լեգիտիմությունից, քանի որ ձևավորվել է քաղաքացիների քվեների «գողության» արդյունքում։

Մանուկյանը, հղում անելով Սահմանադրական դատարանի որոշմանը, նշել է, որ Կենտրոնական ընտրական հանձնաժողովը՝ Վահագն Հովակիմյանի գլխավորությամբ, չի կանխել ընտրական գործընթացի վրա էական ազդեցություն ունեցող խախտումները։ Ըստ պատգամավորի՝ ՍԴ-ն չորս էջի վրա արձանագրել է խախտումներ, որոնց չլինելու պարագայում «Բարգավաճ Հայաստան» կուսակցությունը կստանար 4% և կլիներ խորհրդարանում։

Նա անդրադարձել է նաև կալանքի տակ գտնվող գործընկերներին՝ մասնավորապես Արթուր Սարգսյանին և Մամիկոն Ասլանյանին։ Մանուկյանը Սարգսյանի նկատմամբ հարուցված գործը որակել է որպես դատախազության «ստի» վրա հիմնված՝ նշելով, որ «գերզենքերի» և «երկաթե աստղիկների» մասին պնդումները դատարանում փլուզվում են։ Նա նաև պատմել է Մամիկոն Ասլանյանի որդու՝ Լևոնի մասին, ով համալսարանում սովորելու փոխարեն ստիպված է եղել հորը կալանավայր «պերեդաչա» տանել, ինչը ծիծաղելի է դարձնում դասախոսների խոսքերը դատական համակարգի անկախության մասին։

Պատգամավորը մերժել է Ռուբեն Ռուբինյանի առաջարկած «զրո կետից» սկսելու մոդելը՝ այն նմանեցնելով 1988 թվականի սովետական զինվորի վարքագծին, ով ավտոմեքենան ջարդելուց հետո ուղղակի ասում էր՝ извини, друг։ Նրա խոսքով՝ հասարակությունը ստացել է հանցավոր տրավմա, քանի որ քաղաքացիներն այլևս ապրում են 24-ժամյա գաղտնալսման վախի ներքո։

Մանրամասները՝ տեսանյութում։