Մարդը, ով ուզում է դառնալ ԱԺ նախագահ, ռազմական հանցագո՞րծ է, թե՞ պետական դավաճան. Էդգար Ղազարյանը՝ Ռուբեն Ռուբինյանին․ ՏԵՍԱՆՅՈւԹ

Ազգային ժողովի 9-րդ գումարման անդրանիկ նիստի ժամանակ պատգամավոր Էդգար Ղազարյանն իր ելույթը սկսել է նիստի կազմակերպման քննադատությամբ՝ նշելով, որ այն մեկնարկել է կանոնակարգի կոպտագույն խախտումներով։ Ըստ պատգամավորի՝ խորհրդարան չի հրավիրվել Ամենայն Հայոց Կաթողիկոսը, իսկ պատգամավորները զրկվել են վարման կարգի վերաբերյալ խոսելու և երդման տեքստն անհատապես հնչեցնելու հնարավորությունից։ Բացի այդ, նա մեղադրել է Ռուբինյանին և Հասանովին զոհվածների հիշատակը լռության րոպեով չհարգելու համար՝ ինքնուրույն հայտարարելով այն դահլիճում։

Նախկին դեսպան Էդգար Ղազարյանը հայտարարել է, որ Ռուբինյանի ընտրությունը կանխորոշված է եղել Թուրքիայի կողմից։ Նա հիշեցրել է, որ Թուրքիայի հատուկ ներկայացուցիչ Սերդար Քըլըչը շնորհավորել էր Ռուբինյանին դեռևս հունիսի 25-ին՝ մինչև Սահմանադրական դատարանի որոշումը։ Ղազարյանի պնդմամբ՝ Հայաստանում իշխանության վերահսկողության «բաժանում» է տեղի ունեցել. կառավարությունը վերապահվել է Ադրբեջանին, իսկ Ազգային ժողովը՝ Թուրքիային։

Նրա խոսքով՝ Ռուբինյանն ապօրինի կերպով է ստանձնել հայ-թուրքական բանակցողի դերը, քանի որ Սահմանադրությամբ արտաքին քաղաքականությունը կառավարության իրավասությունն է։ Ըստ Ղազարյանի՝ չի եղել որևէ իրավական ակտ, որով Ռուբինյանը կնշանակվեր այդ պաշտոնում, ինչը նա որակել է որպես սահմանադրական կարգի տապալում և ինքնիրավչություն։

Ղազարյանը նշել է, որ Ռուբինյանը, ով 2016-ին որպես կամավոր պաշտպանել է Արցախի տարածքները, այսօր դրանք համարում է ադրբեջանական։

«Մարդը, ով ուզում է դառնալ ԱԺ նախագահ, նա ռազմական հանցագո՞րծ է, թե՞ պետական դավաճան»,- եզրափակել է Ղազարյանը։

Մանրամասները՝ տեսանյութում։