Բրիտանացի պատգամավորները պահանջել են «Մաշան և արջը» հեռացնել սթրիմինգային ծառայություններից

Ավելի քան 50 բրիտանացի պատգամավորներ բաց նամակ են հղել Մեծ Բրիտանիայի մշակույթի նախարար Լիզա Նանդիին՝ պահանջելով «Մաշան և արջը» մուլտսերիալը հեռացնել սթրիմինգային ծառայություններից, հաղորդում է The Guardian-ը, փոխանցում է Current time-ը։

Բողոքի պատճառը Netflix-ի՝ երկու նոր եթերաշրջաններ ձեռք բերելու և հեռարձակման լիցենզիան ընդլայնելու որոշումն է, որը ներառում է ավելի քան 100 երկիր, այդ թվում՝ բրիտանական ITVX ծառայությունը։ Նամակը, որը նախաձեռնել է Լիբերալ դեմոկրատական կուսակցության պատգամավոր Թոմ Գորդոնը, պնդում է, որ չորսամյա Մաշայի որոշ չարաճճիություններ, որը չի առանձնանում «նրբությամբ», «քարոզչական բովանդակություն» են պարունակում։

Կոնկրետ բողոքները վերաբերում են երկու դրվագների. մեկում Մաշան հայտնվում է տանկային սաղավարտով, իսկ մյուսում՝ НКВД հիշեցնող գլխարկով։

Պատգամավորները կարծում են, որ սա «ակտիվորեն նպաստում է խորհրդային ռազմական խորհրդանիշների տարածմանը փոքր երեխաների շրջանում համաշխարհային լսարանի համար»։ Նամակի հեղինակները մեջբերել են Ուկրաինայի Ապատեղեկատվության դեմ պայքարի կենտրոնի մեկնաբանությունները, որտեղ նշվում է, որ «Մաշան և արջը» պարզապես մուլտֆիլմ չէ, այլ ռուսական փափուկ ուժի գործիք, որը «Մաշայի վարքագծով ծաղրում է այլ ազգերի ավանդույթները և նորմալացնում խորհրդային խորհրդանիշներն ու ռազմատենչ թեմաները»։

Animaccord Studio-ն հերքում է բոլոր մեղադրանքները։ Դրա ներկայացուցիչ Մելանի Բոնվիչինոն դրանք անվանել է «կեղծ և զրպարտչական»՝ ընդգծելով, որ ընկերությունը երբեք պետական ​​ֆինանսավորում չի ստացել։

Թարգմանությունը՝ Էմմա Չոբանյանի