Կատարը հայտարարել է, որ Դոհայում ԱՄՆ-Իրան անուղղակի բանակցությունները «դրական առաջընթաց» են գրանցել

Կատարը հայտարարել է, որ ԱՄՆ-ի և Իրանի բանակցողների միջև Դոհայում կայացած առանձին անուղղակի հանդիպումները «դրական առաջընթաց» են գրանցել Իսլամաբադի փոխըմբռնման հուշագրին վերաբերող հարցերի շուրջ, երկու կողմերն էլ համաձայնել են շարունակել քննարկումները, գրում է CNN-ը։

Կատարի ԱԳ նախարարության խոսնակ Մաջեդ ալ-Անսարին X-ում գրառման մեջ նշել է, որ կատարցի և պակիստանցի միջնորդները Կատարի մայրաքաղաքում առանձին բանակցություններ են վարել ԱՄՆ-ի և Իրանի պատվիրակությունների հետ։ Ըստ նրա՝ քննարկումները հիմնված են Շվեյցարիայում կայացած բարձր մակարդակի հանդիպման արդյունքների վրա, և որ հաջորդ հանդիպումը կնշանակվի «հնարավորինս շուտ»՝ Իրանի նախկին գերագույն առաջնորդի հուղարկավորության արարողությունից հետո։

Իրանի իշխանությունները սպանված առաջնորդ այաթոլլահ Ալի Խամենեիի հուղարկավորության արարողությունը ծրագրում են հուլիսի 4-9-ը Իրանի և Իրաքի տարբեր վայրերում՝ նրա մահից մի քանի ամիս անց։ Նա սպանվել է ԱՄՆ-Իսրայել պատերազմի առաջին օրը՝ փետրվարի 28-ին, Իրանի դեմ ուղղված ավիահարվածի ժամանակ։ Պաշտոնյաները մշակել են բազմօրյա ժամանակացույց, որը ընդգրկում է Թեհրանը, Ղոմը և Մաշհադը՝ Իրանում, ինչպես նաև Նաջաֆը և Քարբալան՝ Իրաքում, հուղարկավորությունը վերածելով ազգային և տարածաշրջանային միջոցառման։

Իրաքը հաստատել է, որ Խամենեիի հրաժեշտի արարողություններ կանցկացվեն Նաջաֆում և Քարբալայում՝ Բաղդադից հարավ գտնվող երկու շիա սրբազան քաղաքներում:

Ալի Խամենեիի հիշատակի արարողությունները կսկսվեն Թեհրանում շաբաթ և կիրակի օրերին՝ Մոսալլա աղոթքի համալիրում, որը պետական ​​կրոնական խոշոր հավաքույթների համար նախատեսված քաղաքի գլխավոր վայրն է։ Հուլիսի 7-ին երթը կշարժվի դեպի Ղոմ, որն Իրանում շիա աստվածաբանության կենտրոնն է և աշխարհում շիաների ամենակարևոր ճեմարանական քաղաքը։ Խամենեիի մարմինը հողին կհանձնեն նրա հայրենի Մաշհադ քաղաքում՝ հուլիսի 9-ին։

Թարգմանությունը՝ Էմմա Չոբանյանի