Խաղաղաշինության հանձնաժողովը կարևոր կամուրջ է. Պարույր Հովհաննիսյանը մասնակցել է ՄԱԿ նստաշրջանին

Հայաստանը, առաջին անգամ լինելով ՄԱԿ-ի Խաղաղաշինության հանձնաժողովի անդամ, մասնակցել է հանձնաժողովի տարեկան նստաշրջանին, որտեղ ՄԱԿ-ում ՀՀ մշտական ներկայացուցիչ Պարույր Հովհաննիսյանը կարևորել է խաղաղաշինության, կանխարգելման և միջազգային համագործակցության դերը կայուն խաղաղության ապահովման գործում։ Այս մասին տեղեկացնում են ՄԱԿ-ում ՀՀ մշտական ներկայացուցչությունից:

«Իր ելույթում Պարույր Հովհաննիսյանն ընդգծել է, որ Հայաստանը, առաջին անգամ ընտրված լինելով Խաղաղաշինության հանձնաժողովի անդամ, ողջունում է Խաղաղաշինության շաբաթվա անդրանիկ անցկացումը, որը նվիրված է ՄԱԿ-ի խաղաղաշինության ճարտարապետության քսանամյակին։

Հավելվել է, որ ՄԱԿ-ի խաղաղաշինության հանձնաժողովը կայացել է որպես երկխոսության, գործընկերություններ կառուցելու և քաղաքականությունների ներդաշնակեցման համար կարևոր հարթակ՝ նկատելով, որ նախորդ տարի ընդունված Խաղաղաշինության ճարտարապետության ՄԱԿ Գլխավոր ասամբլեայի և Անվտանգության խորհրդի «զույգ» բանաձևերով ընդգծվում է կանխարգելման օրակարգի, ազգային առաջնորդության, ներառականության և ինտեգրված մոտեցումների կարևորությունը խաղաղության պահպանման համար։

Դեսպան Հովհաննիսյանը նաև առանձնանշել է, որ Խաղաղաշինության հանձնաժողովը կարևոր կամուրջ է ՄԱԿ-ի Անվտանգության խորհրդի, ՄԱԿ-ի տնտեսական և սոցիալական խորհրդի և Գլխավոր ասամբլեայի միջև՝ նպաստելով խաղաղության և անվտանգության, զարգացման ու մարդու իրավունքների օրակարգերի կապակցմանը»,- ասվում է հաղորդագրությունում։