03.08.2026 | 20:47
Վաղը Նորքի 9-րդ զանգվածի որոշ հասցեներում գազանջատումներ կլինեն
Թրամփը G7-ի առաջնորդներին խոստացել է աջակցել Ուկրաինային՝ Հորմուզի նեղուցում ականազերծմանը նրանց օգնության դիմաց․ Politico
Քաղաքականություն
17.06.2026 | 13:36
G7-ի գագաթնաժողովում ԱՄՆ նախագահ Դոնալդ Թրամփը Մեծ յոթնյակի երկրների առաջնորդներին կոչ է արել օգնել Միացյալ Նահանգներին Հորմուզի նեղուցի ականազերծման հարցում՝ Ուկրաինային աջակցության դիմաց։ Այս մասին հաղորդում է Politico-ն՝ հղում անելով աղբյուրներին, գրում է Meduza-ն։
«Չեմ կարծում, որ մեզ մեծ օգնություն է պետք լինելու»,- ասել է Թրամփը լրագրողներին։
Սակայն, ըստ աղբյուրի, փակ դռների հետևում ԱՄՆ նախագահն «ավելի ճկուն դիրքորոշում» է ընդունել՝ Իրանի հետ գործարքի համար G7 երկրներից ինչպես քաղաքական, այնպես էլ գործնական աջակցության հասնելով։
«Նրան [Թրամփին] անհրաժեշտ կլինեն G7-ի դաշնակիցների և այլ երկրների կարողությունները՝ Հորմուզի նեղուցն ականներից մաքրելու համար։ Դրա դիմաց պետք է լինեն զիջումներ Ուկրաինայի հարցում։ Շատ մեծ ակնկալիք կա, որ նա կաջակցի Ուկրաինային։ Ահա թե ինչ է նա ասել առաջնորդներին»,- Politico-ին ասել է աղբյուրը։
Գերմանիայի կանցլեր Ֆրիդրիխ Մերցը նշել է, որ գագաթնաժողովում կայացած քննարկումները, այդ թվում՝ Թրամփի հետ, «որոշակի լավատեսություն են ներշնչում»։ Politico-ն հաղորդում է, որ Սպիտակ տան նկատմամբ այս լավատեսությունը կիսում են նաև G7-ի մյուս առաջնորդները։
Ֆրանսիայի Էվիան քաղաքում G7-ի երկրների ղեկավարների գագաթնաժողովը մեկնարկել է հունիսի 16-ին։
Ուկրաինայի նախագահ Վլադիմիր Զելենսկին հանդիպել է Թրամփի և Ֆրանսիայի նախագահ Էմանուել Մակրոնի հետ։ Թրամփը հանդիպումը որակել է լավ և խոստացել կրկին խոսել Ուկրաինայի նախագահի հետ։ Առաջին օրվանից հետո հրապարակված համատեղ հայտարարության մեջ նշվում է, որ G7-ի առաջնորդները կավելացնեն Ուկրաինային զենքի մատակարարումները և կուժեղացնեն ճնշումը Ռուսաստանի ռազմական տնտեսության վրա։ G7-ի առաջնորդները նաև աջակցել են Իրանի և Միացյալ Նահանգների միջև Հորմուզի նեղուցը բացելու մասին համաձայնագրին։ Դրա ստորագրումը սպասվում է հունիսի 19-ին։
Թարգմանությունը՝ Էմմա Չոբանյանի
