Քաղաքականություն
17.06.2026 | 13:14
Ֆրանսիայի Էվիան-լե-Բեն քաղաքում անցկացված «Մեծ յոթնյակի» (G7) գագաթնաժողովում երկրները համաձայնել են նոր պատժամիջոցներ կիրառել ռուսական գազի և նավթի ոլորտների դեմ։ Այս մասին ասվում է G7-ի առաջնորդների եզրափակիչ հայտարարության մեջ, գրում է DW-ի ռուսական ծառայությունը։
«Մենք պարտավորվում ենք մեծացնել ճնշումը Ռուսաստանի ռազմական տնտեսության վրա։ Այս համատեքստում մենք կուժեղացնենք պատժամիջոցները, այդ թվում՝ նավթի և գազի ոլորտների դեմ»,- նշվում է փաստաթղթում։
Ընդգծվում է, որ հիմա «հարմար պահն» է Մոսկվայի դեմ նոր պատժամիջոցների համար, քանի որ ԱՄՆ նախագահ Դոնալդ Թրամփը հասել է Իրանի հետ համաձայնագրի Հորմուզի նեղուցը բացելու վերաբերյալ, որով անցնում են նավթի և գազի մեծ ծավալներ։
«Մեծ յոթնյակի» երկրները նաև հայտարարել են, որ «միասնական են Ուկրաինային իրենց անսասան աջակցության հարցում, որը պաշտպանում է իր ազատությունը, ինքնիշխանությունը և տարածքային ամբողջականությունը»։
«Մենք կրկին հայտարարում ենք Ուկրաինայի ժողովրդի հետ մեր համերաշխության մասին, որը տառապում է կրիտիկական ենթակառուցվածքների և մշակութային ժառանգության կոթողների վրա հարձակումներից։ Մենք բարձր ենք գնահատում Ուկրաինայի դիմացկունությունը և վերջին ամիսներին մարտադաշտում ձեռք բերված հաջողություններն ու ընդգծում ենք, որ այնտեղ այժմ նկատվում է նոր դինամիկա»,- ասվում է հայտարարության մեջ։
«Այս նոր դինամիկային աջակցելու և ամրապնդելու» համար առաջնորդները համաձայնել են ավելացնել Ուկրաինային հակաօդային պաշտպանության համակարգերի, որսացող սարքերի, հեռահար հրթիռների և այլ զենքի մատակարարումները: Նրանք նաև խոստացել են «դիտարկել Ուկրաինային իր տարածքում ռազմական արտադրության ծավալը մեծացնելու համար լիցենզիաներ տրամադրելու հնարավորությունը»:
Բացի այդ, G7-ը խոստացել է շարունակել աջակցել Ուկրաինային էներգետիկայի ոլորտում՝ «երկրին օգնելու գոյատևել առաջիկա ձմռանը»:
G7-ի կազմում են Գերմանիան, ԱՄՆ-ը, Մեծ Բրիտանիան, Ֆրանսիան, Իտալիան, Ճապոնիան և Կանադան:
Թարգմանությունը՝ Էմմա Չոբանյանի
